საქართველოს პარლამენტის თავმჯდომარის, შალვა პაპუაშვილის განცხადებით, პრემიერ-მინისტრის პარლამენტის წიაღიდან არჩევა აჩვენებს პოლიტიკური სისტემის სიჯანსაღეს, მათ შორის ახალ სტანდარტებს და განსაკუთრებული მოვლენაა ქართული დემოკრატიის განვითარებისთვის.

„პირველად მას შემდეგ, რაც სრულად საპარლამენტო სისტემაზე გადავედით, პარლამენტის წიაღიდან ხდება ადამიანი პრემიერ-მინისტრი. ეს აჩვენებს „ქართული ოცნების“ პარტიულ სიჯანსაღეს. ასევე, ისიც, რომ ყოფილი პრემიერ-მინისტრი პარტიულ თანამდებობას იკავებს და უკვე პარტიულ საქმიანობას აგრძელებს. თავად ის ფაქტი, რომ უმრავლესობის ლიდერი, პარლამენტის ყოფილი თავმჯდომარე, პარლამენტის გამოცდილი წევრი ხდება პრემიერ-მინისტრი, არის განსაკუთრებული მოვლენა ჩვენი დემოკრატიისა და დემოკრატიის განვითარებისთვის.

ვფიქრობ, ეს განსაკუთრებით საინტერესო მომენტი უნდა იყოს ოპოზიციისთვის, რადგან კოლეგა, რომელთანაც მათ წლები ჰქონდათ ურთიერთობა, შეიძლება, მწვავე საჯარო დებატებიც, მაგრამ ამ დებატებს მიღმა ყოველთვის არის ადამიანური ურთიერთობებიც. ამ ურთიერთობებით, ამ დებატების გამოცდილებით იქნება პრემიერ-მინისტრი და ეს სხვა დინამიკას შესძენს მთავრობასა და პარლამენტს, მათ შორის საპარლამენტო ოპოზიციას და მთავრობას შორის ურთიერთობას“, – განუცხადა შალვა პაპუაშვილმა „კვირის მოამბეს“.

პარტია „ქართულმა ოცნებამ“ პირველ თებერვალს რიგით მერვე ყრილობა გამართა. ყრილობაზე ირაკლი ღარიბაშვილი პარტიის თავმჯდომარედ აირჩიეს. ასევე, მმართველმა პარტიამ პრემიერ-მინისტრობის კანდიდატად ირაკლი კობახიძე ოფიციალურად წარადგინა.