„ნაციონალური მოძრაობის“ ყოფილი წევრები, ლიდერები თითქოს ემიჯნებიან მშობლიურ „ნაციონალურ მოძრაობას“, მის ლიდერს, რაც საზოგადოების მოტყუების მცდელობაა”, - ამის შესახებ საქართველოს პარლამენტის ვიცე-სპიკერმა, არჩილ თალაკვაძემ პარლამენტში განაცხადა.

მისი თქმით, პარტია „ქართული ოცნება“ არის მომავალზე ორიენტირებული და მის მიმართ ხალხის მხარდაჭერა კონკრეტული შედეგებით არის განპირობებული.

„მას შემდეგ, რაც დეკემბერში ჩამოიშალა რადიკალური ოპოზიციის გეგმა, დაებლოკათ საქართველოსთვის ევროპული მომავალი, კანდიდატის სტატუსის მიღება, ქვეყანაში ყოფილიყო ეკონომიკური რეცესია, ძირი გამოეთხარათ ქვეყნის უსაფრთხოების, სტაბილურობისთვის, ამის შემდეგ და ცხრა არჩევნების დამარცხების შემდეგ, როგორც იქნა „ნაციონალური მოძრაობა“, მისი პატრონები, ლობისტები დარწმუნდნენ, რომ ამ პოლიტიკური პარტიით რაიმე წარმატებაზე, ელექტორალურ გაუმჯობესებაზე საუბარი, ფიქრი ზედმეტია და დაიწყეს ახალი პროექტი – „ნაციონალური მოძრაობა ორი“.

დღეს ვხედავთ „ნაციონალური მოძრაობის“ ყოფილი წევრების, ლიდერების აქტიურ მცდელობას, თითქოს ემიჯნებიან მშობლიურ „ნაციონალურ მოძრაობა პირველს“ და ემიჯნებიან მის ლიდერს, რომელიც მართლმსაჯულების წინაშე წარსდგა. რა თქმა უნდა, ეს არის ჩვენი საზოგადოების მოტყუების მცდელობა. არავის უნდა ჰქონდეს ილუზია, რომ ახალ პოლიტიკურ პრეფერენსიებს სთავაზობს ოპოზიცია ჩვენს საზოგადოებას და ამომრჩეველს. ეს არის იგივე „ნაციონალური მოძრაობა“, რებრენდირებული, იმავე ადამიანებით, შინაარსით და დესტრუქციული დღის წესრიგით.

კარგად იციან, რომ „ქართულ ოცნებას“ აქვს მყარი საზოგადოებრივი მხარდაჭერა და 60%-იანი პოლიტიკური რეიტინგი. კარგად იციან, რომ „ნაციონალური მოძრაობა ერთი“ 15-დან 20%-მდე მხარდამჭერზე მეტს ვერ შეაგროვებს, ამიტომ მათ დავალება აქვთ, როგორმე შეინარჩუნონ ეს მხარდაჭერა, ხოლო დარჩენილ 20%-ზე იბრძვის პოლიტიკური ბანაკი „ნაციონალური მოძრაობა ორი“. მათი მიზანია, დარჩენილი 20%-დან, ე.წ. გადაუწყვეტელი ელექტორატიდან როგორმე დაუმატოს ხმები „ნაციონალურ მოძრაობა ერთს“. ახალი პოლიტიკურ ბანაკისთვის, რომელსაც ახლა „ლელო“ მეთაურობს და სალომე ზურაბიშვილი მათ პროგრამას, სამომავლო ხედვას აჟღერებდა პარლამენტში, ხმის მიცემა, მათი მხარდაჭერა ნიშნავს ისევ და ისევ „ნაციონალური მოძრაობის“ და მათი ხელისუფლებაში დაბრუნების მცდელობის მხარდაჭერას. ამიტომ, შემდეგი თვეების განმავლობაში ჩვენი ამოცანა იქნება, მაქსიმალური ინფორმაცია მივაწოდოთ საზოგადოებას, რის გაკეთებას ვაპირებთ. ჩვენი პარტია არის მომავალზე ორიენტირებული. საქმე, გამოცდილება გვიმაგრებს ზურგს. რაც მთავარია, მხარდაჭერა, რომელიც დღეს გვაქვს, განპირობებულია კონკრეტული შედეგებით. ეს არის ქვეყნის მშვიდობის და სტაბილურობის, უსაფრთხოების დაცვა, ეკონომიკური ზრდა, კანდიდატის სტატუსის მიღება, საქართველოს წარმატებები ევროინტეგრაციის გზაზე. ეს არის დღევანდელი რეალობა და საარჩევნო ადმინისტრაციის საბოტაჟი ამას ემსახურება, რომ როგორმე მარცხი გადააბრალონ საარჩევნო ადმინისტრაციას“, - განაცხადა არჩილ თალაკვაძემ.