საქართველოს პრემიერ-მინისტრმა გიორგი კვირიკაშვილმა კითხვაზე - არის თუ არა ვარშავის სამიტის შემდეგ საქართველო უფრო ახლოს NATO-ს წევრობასთან, განაცხადა, რომ საქართველო კიდევ უფრო ახლოს არის NATO-ს წევრობასთან.

როგორც გიორგი კვირიკაშვილმა აღნიშნა, ვარშავის სამიტმა ცხადყო, რომ საქართველო წარმატებით მიიწევს წინ NATO-ს წევრობისკენ, როგორც პოლიტიკური, ისე პრაქტიკული თანამშრომლობის კუთხით. მისივე თქმით, მოკავშირეებმა დაადასტურეს ბუქარესტის სამიტის გადაწყვეტილება იმის შესახებ, რომ საქართველო გახდება NATO- ს წევრი.

„მათ ხაზგასმით აღნიშნეს, რომ ინტეგრაციის პროცესი წარმატებით ვითარდება და საქართველოს აქვს ყველა პრაქტიკული ინსტრუმენტი NATO-ში გაწევრებისთვის მოსამზადებლად.

რაც შეეხება პრაქტიკულ თანამშრომლობას, მოკავშირეები შეთანხმდნენ, რომ უზრუნველყოფენ დამატებით მხარდაჭერასა და დახმარებას საქართველოს თავდაცვისუნარიანობისა და უსაფრთხოების განსამტკიცებლად. ეს მნიშვნელოვანი უახლესი გადაწყვეტილებები მოიცავს: ერთობლივი წვრთნებისა და შეფასების ცენტრის დაკავშირებას მოკავშირეთა ტრანსფორმაციის სარდლობის საწვრთნელ და საგანმანათლებლო საქმიანობასთან; საქართველოს საჰაერო თავდაცვისა და საჰაერო დაზვერვის მხარდაჭერას; ტრასტის შექმნას NATO-საქართველოს ერთობლივი პროექტების ეფექტიანად განხორციელების ფინანსური მხარდაჭერისთვის.

მოკავშირეებმა ხაზი გაუსვეს იმას, რომ როგორც არსებული, ისე ახალი ინიციატივები ეხმარება საქართველოს, როგორც წევრობის მსურველ ქვეყანას, NATO-ს წევრობისთვის მომზადების გზაზე. კიდევ ერთი ძლიერი გზავნილი გაჟღერდა 7-8 სექტემბერს, სამიტიდან სულ რაღაც ორი თვის შემდეგ, როცა ჩრდილოატლანტიკური საბჭო ვიზიტით იმყოფებოდა საქართველოში, რათა განხილულიყო ვარშავის გადაწყვეტილებების გატარების პრაქტიკული გზები. ეს იყო საბჭოს რიგით მეოთხე ვიზიტი", - განაცხადა პრემიერმა ატლანტიკური საბჭოს სარედაქციო დირექტორის მოადგილესთან აშიშ კუმარ სენთან ინტერვიუში.

მისივე თქმით, გადაწყვეტილება იმის შესახებ, რომ საქართველო გახდება NATO-ს წევრი, მიღებული იყო ბუქარესტის სამიტზე და ეს გადაწყვეტილება მას შემდეგ კიდევ არაერთხელ დადასტურდა კიდეც.

„ასე რომ, აქ ლაპარაკია იმაზე, „როდის" გახდება და არა „გახდება თუ არა" საქართველო NATO-ს წევრი. როგორც საქართველოში ჩრდილოატლანტიკური საბჭოს ბოლო ვიზიტის დროს NATO-ს გენერალურმა მდივანმა აღნიშნა, NATO იცავს იმ ფუნდამენტურ პრინციპს, რომლის მიხედვითაც ყველა სუვერენულ სახელმწიფოს აქვს უფლება, თავად განსაზღვროს თავისი გზა, უსაფრთხოების საკითხებში ამა თუ იმ გაერთიანებაში თუ სამხედრო ალიანსში გაწევრების ჩათვლით. გადაწყვეტილება საქართველოს წევრობის შესახებ ერთპიროვნულად მიიღეს ალიანსის წევრმა სახელმწიფოებმა და ეს გადაწყვეტილება გამომდინარეობდა საქართველოს დამსახურებიდან და ალიანსის უსაფრთხოებაში მის მიერ წვლილის შეტანის პერსპექტივიდან", - განაცხადა კვირიკაშვილმა.

მისივე თქმით, NATO-ს წევრობა არის ქართველი ხალხის სუვერენული არჩევანი და საქართველოს მთავრობის საბოლოო მიზანი.

„ჩვენი ურყევი გადაწყვეტილებაა, ძალ-ღონე არ დავიშუროთ ამ მიზნის მისაღწევად. ამავე დროს, ჩვენ ვაცნობიერებთ, რომ წინ გამოწვევებით აღსავსე გზა გველის, და ჩვენ მზად ვართ, თანამიმდევრულად მივყვეთ ამ გზას, რომელიც ამ მიზნამდე მიგვიყვანს.

ამავდროულად, ჩვენ მტკიცედ გვწამს, რომ საქართველოსა და რეგიონის სხვა ქვეყნების ევროპული და ევროატლანტიკური მისწრაფებების დაფასება იქნება ძლიერი გზავნილი, რომ 21-ე საუკუნეში მიუღებელია გავლენის სფეროთა აღორძინება და სუვერენული სახელმწიფოების საგარეო პოლიტიკის არჩევნის შეზღუდვის მცდელობები. საქართველოს გაწევრიანება NATO-ში გააფართოებს ევროპის უსაფრთხოებისა და სტაბილურობის ზონას, რითაც სამსახურს გაუწევს როგორც მოკავშირეთა, ისე საქართველოს საერთო ინტერესებს. საქართველომ დაამტკიცა თავისი ურყევი პოლიტიკური ნება და უნარი, წვლილი შეიტანოს საერთო უსაფრთხოებისა და სტაბილურობის განმტკიცებაში. ჩვენ ნათლად ვაჩვენეთ, რომ ვეძებთ არა მხოლოდ უსაფრთხოების გარანტიებს, არამედ მზად ვართ, წვლილი შევიტანოთ საერთო უსაფრთხოებაზე ზრუნვის საქმეში.

გარდა ამისა, NATO-ში ჩვენი წევრობა დადებითად აისახება რეგიონალურ უსაფრთხოებაზე. საქართველოს წარმატება ევროკავშირსა და ევროატლანტიკურ სივრცეში ინტეგრაციის გზაზე იქნება შთამბეჭდავი მაგალითი, რომ ჩვენს რეგიონში შესაძლებელია დემოკრატიული ტრანსფორმაცია და საგარეო პოლიტიკის დამოუკიდებელი არჩევნის პატივისცემა", - განაცხადა გიორგი კვირიკაშვილმა.