ბრატისლავაში გამართულ არაფორმალურ სამიტზე ევროკავშირის ლიდერები შეთანხმდნენ, რომ 6 თვეში ევროკავშირის განვითარების დეტალურ გეგმას წარადგენენ.

„ბრატისლავაში შევთანხმდით, რომ უახლოეს თვეებში ჩვენს მოქალაქეებს ევროკავშირის მიმზიდველი მოდელის შესახებ ჩვენს ხედვას გავაცნობთ, რომელსაც შეუძლიათ ენდონ და მხარი დაუჭირონ", - ნათქვამია სამიტის შემდეგ მიღებულ კომუნიკეში.

აღნიშნულ გეგმას წარადგენენ მომავალი წლის მარტში, რომში დაგეგმილ ევროკავშირის სამიტზე.

„მიუხედავად იმისა, რომ ერთმა ქვეყანამ ჩვენი რიგების დატოვება გადაწყვიტა, ევროკავშირს ჩვენთვის ალტერნატივა არა აქვს", - აღნიშნულია დეკლარაციაში.

ანგელა მერკელის განცხადებით, გეგმაში განსაკუთრებული ყურადღება დაეთმობა არალეგალურ მიგრაციასთან ბრძოლას და უსაფრთხოების სფეროში თანამშრომლობის გაძლიერებას.

ევროკავშირის სამიტი დიდი ბრიტანეთის გარეშე პირველად  ჩატარდა.