ესტონეთის პრეზიდენტმა ტოომას ჰენდრიკ ილვესმა გაერო-ს გენერალური ასამბლეის 71-ე სესიაზე სიტყვით გამოსვლის დროს განაცხადა, რომ როდესაც 2008 წელს რუსეთი საქართველოში შეიჭრა, მან საერთაშორისო სამართალი დაარღვია, მოგვიანებით იგივე გამეორდა უკრაინაში, თუმცა გაერო-მ ეფექტური რეაგირება მაინც ვერ შეძლო.

„ნათელია, რომ რუსეთის შეჭრა საქართველოში საერთაშორისო სამართლის დარღვევა იყო. 6 წლის შემდეგ, 2014 წელს, ჩვენ ამის გამეორება უკრაინაში ვნახეთ. პირველად მეორე მსოფლიო ომის შემდეგ, საზღვრები ევროპაში ძალის გამოყენებით შეიცვალა. გაერო-ს წესდება უხეშად დაირღვა, თუმცა გაერო-მ ეფექტურად რეაგირება ვერ შეძლო. უკრაინაში რუსეთის აგრესია კვლავ გრძელდება. უკრაინის და საქართველოს ტერიტორიები უცხოელი სამხედროების მიერ კვლავ რჩება ოკუპირებული, მაშინ როცა მთიან ყარაბაღსა და დნესტრისპირეთში გაყინულ კონფლიქტებთან გვაქვს საქმე", - განაცხადა ტოომას ჰენდრიკ ილვესმა.

ესტონეთის პრეზიდენტის თქმით, ყველა არსებული კონფლიქტის და კრიზისის აღკვეთა შეუძლებელია, მაგრამ შედეგების შერბილება შესაძლებელი იქნებოდა, გაერო-ს საჭირო მექანიზმები და ოპერატიულად რეაგირების შესაძლებლობა რომ ჰქონოდა.