დევნილთა და განსახლების მინისტრმა, სოზარ სუბარმა გადაცემა 2030-ში სტუმრობისას განაცხადა, რომ სამეგრელოში ძალიან მალე  პორტის მშენებლობა და ბოტანიკური ბაღის გაშენება დაიწყება, რომელიც დაახლოებით, 100 ჰექტარზე იქნება განფენილი.  

„ჩამოყვანილია მსოფლიოს 6 საუკეთესო ბოტანიკოსი და მცენარეების შერჩევა, მათი რჩევებით ხდება.  ბილიკები, ხიდები, გადასასვლელები და დაკიდული გზები ამ ადგილს უნიკალურს და ტურისტებისთვის მიმზიდველს გახდის. ასევე მნიშვნელოვანია იმ 2 უზარმაზარი სასტუმროს მშენებლობა, რომელიც ბიძინა ივანიშვილის დაფინანსებით შენდება. მხოლოდ ერთის მშენებლობა 90 მილიონი ჯდება და დაახლოებით იგივეა მეორეს ღირებულებაც. ესაა უზარმაზარი ინვესტიცია, რომელიც ამ ადგილს მიმზიდველს გახდის", - განაცხადა სუბარმა.

სუბარმა ასევე აღნიშნა, რომ  რამდენიმე დღეში იქნება ახალი პორტის მშენებლობის პროექტის პრეზენტაცია.

„ეს იქნება ყველაზე დიდი პროექტი, რაც კი საქართველოში აქამდე განხორციელებულა. პორტი საქართველოს ახალ პოტენციალს გაუხსნის.  თავისუფლად შეიძლება, ახალი პორტის დაარსება ბათუმისა და ფოთის, როგორც ინფრასტრუქტურული ღერძების დაარსებას შევადაროთ. მშენებლობებზე დასაქმდება არა მარტო ადგილობრივი მოსახლეობა, არამედ მუშა ხელი უფრო ფართო არეალიდან იქნება მოზიდული", - განაცხადა მინისტრმა.

როგორც სუბარმა აღნიშნა, აფხაზებისთვის ძალიან დიდი შეთავაზება გაკეთდა, რაც ძალიან ბევრ ადამიანს დააფიქრებს. 

„აფხაზებისთვის ძალიან დიდი შეთავაზება გაკეთდა. მათი მხრიდან სწრაფ რეაქციას არ ველოდები, მაგრამ დარწმუნებული ვარ, ეს ძალიან ბევრ ადამიანს დააფიქრებს.  დადგება დრო, როცა აფხაზები დაინახავენ, ენგურს გამოღმა რა ხდება  და ამის გაკეთების სურვილი ენგურს გაღმაც გაჩნდება. მნიშვნელოვანია მათი ჩართულობა იმ პროექტებში, რაც ენგურს გამოღმა უკვე ხორციელდება.  მაგალითად,   C ჰეპატიტის ელიმინაციის პროგრამა. ეს ყველაფერი განწყობებს სერიოზულად ცვლის, რაც მნიშვნელოვანია თუნდაც იმისთვის, რომ პირველ ეტაპზე ვიმეგობროთ და ერთმანეთს თოფის ლულიდან არ ვუყუროთ", - განაცხადა  სუბარმა.