„ახალგაზრდული ცენტრის" ხელმძღვანელი ზურაბ ქადაგიძე „რეპორტიორთან" საუბრისას აცხადებს, რომ მის ხელთ არსებული ინფორმაციით, ბოლო პერიოდში საკმაოდ შესუსტდა მიხეილ სააკაშვილის პოზიციები უკრაინაში, რამაც გამოიწვია ურთიერთობის დაძაბვა უკრაინის პრეზიდენტ პეტრე პოროშენკოსთან. ოდესის ოლქის გუბერნატორის მიმართ ღია უკმაყოფილებას გამოთქვამს ოდესის მოსახლეობა, რადგან მათ ჰქონდათ სულ სხვა მოლოდინები, რეალობა კი მოლოდინებისაგან რადიკალურად განსხვავებულია.

„მან იმედები გაუცრუა უკრაინის მმართველ გუნდს, რადგან მისგან ითხოვდნენ რეფორმების გატარებას და კორუფციის აღმოფხვრას, დღეს კი ოდესის ოლქში კორუფცია ყვავის და არც რაიმე ღირებული რეფორმაა გატარებული. გვაქვს ეჭვი, რომ შექმნილი ვითარებიდან გამომდინარე ლოგიკური იქნება, თუ უახლოეს პერიოდში მიხეილ სააკაშვილს ოდესის ოლქის გუბერნატორის თანამდებობას დაატოვებინებენ. რა თქმა უნდა, ამას გრძნობს სააკაშვილიც, ეს ყველაფერი კი მიჩენს ეჭვს, რომ ის ემზადება საქართველოში დასაბრუნებლად და ვიდეოკადრების გავრცელებით ის ცდილობს ქვეყნაში დაძაბულობისა და არეულობის შემოტანას, რათა შეიქმნას შესაბამისი პლაცდარმი საქართველოში დაბრუნებისათვის. მაგრამ მისდა სამწუხაროდ, მას ეს არ გამოუვა. დღეს ჩვენ ვართ შემდგარი სახელმწიფო, რომელიც უფლებას არ მისცემს რამდენიმე ბნელი აზროვნების, რეგრესისკენ მიდრეკილ ადამიანს, მოახდინოს ქვეყნის წინსვლისა და განვითრების შეფერხება.

საქართველოში დაბრუნების შემთხვევაში მისი ადგილი მხოლოდ და მხოლოდ ჩვენს ციხეებში მოიძებნება, სადაც მას უკვე ელოდება „პროგრესულად მოაზროვნე დემოკრატთა" მთელი პლეადა", - აცხადებს ქადაგიძე.