საგამოძიებო ჯგუფები ყველა იმ ვიდეოკამერის ჩანაწერებს ამუშავებენ, რომლებმაც აფეთქებამდე, გივი თარგამაძის მანქანის გადაადგილება დააფიქსირეს.

შინაგან საქმეთა მინისტრის მოადგილის შალვა ხუციშვილის განცხადებით, შემთხვევის ადგილზე გვიანობამდე მუშაობდნენ ექსპერტ-კრიმინალისტები.

მისივე თქმით, მომხდართან დაკავშირებით, უფრო მეტი ინფორმაცია შესაბამისი ექსპერტიზის ჩატარების შემდეგ გახდება ცნობილი. ხუციშვილის განმარტებით, ამჟამად საგამოძიებო სტრუქტურაში რამდენიმე პირის დაკითხვა მიმდინარეობს.

„გამოძიების ინტერესებიდან გამომდინარე, სხვა კომენტარს ვერ გავაკეთებ", - აცხადებს შინაგან საქმეთა მინისტრის მოადგილე.

გუშინ, ყოფილი „პირიმზის" შენობასთან „ერთიანი ნაციონალური მოძრაობის" ერთ-ერთი ლიდერის - გივი თარგამაძის ავტომანქანა აფეთქდა. აფეთქების დროს ავტომობილში თარგამაძე და მისი მძღოლი იმყოფებოდნენ. დაშავებულია 5 პირი. შინაგან საქმეთა სამინისტროს ინფორმაციით, მომხდარ ფაქტზე გამოძიება სისხლის სამართლის კოდექსის 19-109-ე მუხლით დაიწყო, რაც დამამძიმებელ გარემოებაში განზრახ მკვლელობის მცდელობას გულისხმობს.