9 ოქტომბერს, 19:00 საათზე, თელავში მუსიკის საერთაშორისო ფესტივალი გაიხსნება, რომელიც 15 ოქტომბრის ჩათვლით, საქართველოს კულტურისა და ძეგლთა დაცვის სამინისტროს მხარდაჭერით გაიმართება.

კონცერტი თელავის ვაჟა-ფშაველას სახელობის სახელმწიფო დრამატულ თეატრში ჩატარდება, რომელსაც საქართველოს კულტურისა და ძეგლთა დაცვის მინისტრი მიხეილ გიორგაძე დაესწრება.

ფესტივალი წელს მასშტაბური პროექტის „Check in Georgia"-ს ფარგლებში ტარდება. გასული  საუკუნის 80-იან წლებში ცნობილი  პიანისტის - ელისო ვირსალაძის მიერ  დაარსებული ფესტივალი, 2010  წელს  განახლდა  და  მას  შემდეგ,   ყოველწლიურად, საქართველოს კულტურისა და ძეგლთა დაცვის სამინისტროს  მხარდაჭერით იმართება. ტრადიციულად, ფესტივალი თელავში სხვადასხვა თაობის მსოფლიო რანგის არაერთ მუსიკოსს მასპინძლობს.

წლევანდელი  პროგრამა მეოცე საუკუნის ცნობილი  მევიოლინის - ოლეგ კაგანის  70 წლისთავს ეძღვნება, რომელიც ფესტივალის დაარსების ერთ-ერთი თანამოაზრეა ელისო ვირსალაძესა და ნატალია გუტმანთან ერთად.

2016 წლის მთავარი სიახლე ფესტივალზე  ევროპული ორკესტრის ჩამოსვლაა. ქალაქ  კრაკოვის (პოლონეთი) ბეთჰოვენის აკადემიის ორკესტრის მონაწილეობით ორი კონცერტი გაიმართება. ორკესტრს უდირიჟორებენ  ევროპაში  ცნობილი  პაველ პშიტოცკი და ახალგაზრდა  ქართველი დირიჟორი მირიან ხუხუნაიშვილი. პოლონური ორკესტრისა და დირიჟორის ვიზიტი საქართველოში პოლონეთის საელჩოს მხარდაჭერით განხორციელდა.

9 ოქტომბრიდან 15 ოქტომბრის ჩათვლით, თელავის ვაჟა- ფშაველას სახელობის დრამატულ თეატრში  5  კონცერტი ჩატარდება, რომელშიც მონაწილეობას მიიღებენ აღიარებული მუსიკოს-შემსრულებლები კოლია ბლახერი, ელისო ვირსალაძე, ალექსანდრე ბუზლოვი,  ახალგაზრდა  მუსიკოსები უილიამ დატონი (დიდი ბრიტანეთი), ჩან უეი (ჩინეთი), დმიტრი შიშკინი (რუსეთი).  ფესტივალში ასევე მონაწილეობენ  დავით ოისტრახის სახელობის სიმებიანი კვარტეტი და თბილისის სახელმწიფო კამერული ორკესტრი „საქართველოს სინფონიეტა". ფესტივალის ფარგლებში წინანდლის ალექსანდრე ჭავჭავაძის მუზეუმში ცნობილი საფორტეპიანო დუეტის, ნანა დიმიტრიადისა და ნანა ავალიშვილის დახურული კონცერტი გაიმართება, რომელზეც დასწრება მხოლოდ შეზღუდული რაოდენობის მოსაწვევებით იქნება შესაძლებელი.

ტრადიციულად, ფესტივალი მსმენელს მრავალფეროვან პროგრამას სთავაზობს, რომელშიც  შესულია  როგორც მსოფლიო კლასიკური მუსიკის შედევრები, ასევე  მე-20 საუკუნის ცნობილ კომპოზიტორთა ის ნაწარმოებები, რომლებიც საქართველოში პირველად შესრულდება.

ფესტივალის კონცერტების პარალელურად, გაიმართება  მასტერკლასები  ფორტეპიანოსა  და ჩასაბერი ინსტრუმენტების სპეციალობებში, რომლებშიც კონსერვატორიის სტუდენტებთან ერთად, საქართველოს რეგიონებიდან ჩამოსული ახალგაზრდები მიიღებენ მონაწილეობას.

ბილეთების შეძენა შესაძლებელია თბილისის სახელმწიფო კონსერვატორიის სალაროში  და თელავის ვაჟა-ფშაველას სახელობის დრამატული თეატრის სალაროში. ასევე, ფესტივალის ბილეთები განთავსებულია ვებ-გვერდზე www.biletebi.ge

ფესტივალს წარმოადგენს საქართველოს კულტურისა და ძეგლთა დაცვის სამინისტრო;

ფესტივალის ორგანიზატორია სსიპ  კლასიკური მუსიკის დაცვის, განვითარებისა და პოპულარიზაციის ცენტრი;

მხარდამჭერები: პოლონეთის რესპუბლიკის საელჩო საქართველოში, „ჯიპიაი ჰოლდინგი", წინანდლის ალექსანდრე ჭავჭავაძის სახლ-მუზეუმი, ქალაქ თელავის მერია, თელავის ვაჟა-ფშაველას სახელობის პროფესიული სახელმწიფო დრამატურლი თეატრი, თელავის ნიკო სულხანიშვილის სახელობის სამუსიკო სასწავლებელი, სასტუმრო „ალაზნის ველი", სასტუმრო „ზუზუმბო", დეკორატიული მცენარეების სანერგე „გარდენია" და „შატო მერე";

საინფორმაციო მხარდაჭერა: რადიო „ფორტუნა", რადიო „ერთი", „რუსთავი 2", „საზოგადოებრივი მაუწყებლის" პირველი არხი, საინფორმაციო სააგენტო „GHN", გაზეთი „Georgia Today" და ტელეკომპანია „ARTAREA".