ზუგდიდის რაიონულმა სასამართლოს გადაწყვეტილებით, ჯიხაშკარში, 108-ე უბანზე არჩევნებისთვის ხელის შეშლის ბრალდებით დაკავებულ კაკო ტიბუას აღკვეთის ღონისძიების სახით 10 000-ლარიანი გირაო შეეფარდა.

„სასამართლომ კაკო ტიბუას გირაო შეუფარდა 10 000 ლარის ოდენობით. გირაო შეიძლება უზრუნველყოფილი იყოს უძრავი ქონებითაც. ამიტომ, მე ვფიქრობ, პატიმრობაში მხოლოდ რამდენიმე დღე დარჩება და როგორც კი დაიტვირთება უძრავი ქონება გირაოს სანაცვლოდ, მას გაათავისუფლებენ", - განუცხადა ჟურნალისტებს ადვოკატმა როლანდ შონიამ.

შონია არ გამორიცხავს, რომ გირაოს შეფარდების თაობაზე რაიონული სასამართლოს გადაწყვეტილება სააპელაციო სასამართლოში გაასაჩივრონ, ვინაიდან მიიჩნევს, რომ მისი დაცვის ქვეშ მყოფი აღკვეთის ღონისძიების გარეშე უნდა დარჩენილიყო.