გთავაზობთ უკრაინული გამოცემა „გლავკომის" ინტერვიუდან ამონარიდებს, რომელიც მედიასაშუალებამ საქართველოს იუსტიციის ყოფილ მინისტრთან, ზურაბ ადეიშვილთან ჩაწერა.

„თქვენ გაგიკვირდებათ, მაგრამ მათ, ვინც აღიარებდა ბრალს და ჩვენებებს იძლეოდა მაღალი თანამდებობის პირების წინააღმდეგ, ჩვენ ვთავაზობდით სხვა პრობლემების მოგვარებასაც. ყველაზე მთავარი, რითაც ჩვენ დავიწყეთ - სამართალდამცავებთან თანამშრომლობის მექანიზმი შევქმენით, ასევე, კორუმპირებული პირების მიერ მოპარული ქონების კონფისკაციის მექანიზმი. ჩვენ ვიცავდით მათ, ვინც მოდიოდა თანამშრომლობაზე. ვინც აძლევდა ქრთამს და ჩვენ გვეხმარებოდა, ნაკლებად ისჯებოდა ან საერთოდ თავისუფლდებოდა სასჯელისგან, თუ გვაძლევდა მნიშვნელოვან ინფორმაციას".

რა თქმა უნდა, უკრაინელებს გაუკვირდებათ, მაგრამ ჩვენ უკვე აღარაფერი გვიკვირს და ისიც კარგად გვახსოვს, რა ფასად დაუჯდა ქვეყანას ჩაშვების ინსტიტუტის დამკვიდრება, ქონების კონფისკაცია, საპროცესო გარიგებები მილიონების სანაცვლოდ, ქრთამის მიმცემთა თუ ამღებთა გათავისუფლება, უდანაშაულო ადამიანების წამება, იძულების წესით ჩვენებების მოპოვება და ასე შემდეგ. მიუხედავად იმისა, რომ ადეიშვილი ამ ყველაფერს აღიარებს, მაინც მიიჩნევს, რომ ის მსხვერპლია:

„მე ვიყავი ერთ-ერთი პირველი მსხვერპლი, ჩემს წინააღმდეგ აღძრეს სისხლის სამართლის საქმე. ფორმალურად მე მადანაშაულებენ იმაში, რომ პატიმრების უფლებები ირღვეოდა, მაგრამ პენიტენციური სისტემა საქართველოში იუსტიციის სამინისტროს არ ექვემდებარება, რომელსაც მე ვხელმძღვანელობდი. ეს დაიწყო 2012 წლის გლდანის ციხის ირგვლივ აგორებული სკანდალის დროს. ჩვენ მაშინ ხელისუფლებაში ვიყავით და ციხეებში წამების ორგანიზატორები დავაკავეთ, მაგრამ ახალმა ხელისუფლებამ ზოგიერთი მათგანი გაათავისუფლა. ინტერპოლი მიხვდა, რომ მე პოლიტიკური ნიშნით მდევნიან. თუმცა ახლა არ შემიძლია საქართველოში დავბრუნდე".

ზურაბ ადეიშვილის გამონათქვამებზე კომენტარს აკეთებს ყოფილი მოსამართლე, ადვოკატი და ადეიშვილის კურსელი, შალვა ხაჭაპურიძე:

„ადეიშვილი ლაპარაკობს იმას, რაც სინამდვილეში იყო, არც უმატებს და არც აკლებს. პირველი - სააკაშვილის რეჟიმმა დანერგა ჩაშვების ინსტიტუტი და ადეიშვილი იყო ერთ-ერთი შემსრულებელი. სხვათა შორის, დღეს ხშირად ამბობენ, მთავარი რეჟისორი ეგ იყოო, არ დაიჯეროთ, მთავარი რეჟისორები და სცენარისტები იყვნენ ლევან რამიშვილი, გიგა ბოკერია და "თავისუფლების ინსტიტუტის" შემადგენლობა, რომლებიც მშვიდად აგრძელებენ ცხოვრებას თბილისში. მთავარი აქ სამართალდამცავებთან თანამშრომლობა კი არა, იყო ის დაბალი ზნეობა, რითაც ხელმძღვანელობდნენ ე.წ. ელიტარულ ნაწილში და დღესაც ხელმძღვანელობენ. სიმართლეს ამბობს, ქრთამის მიმცემს ხშირად ვაღავისუფლებდით და პრობლემებსაც კი ვუგვარებდით, ყველაფერს ვპატიობდითო. მაგათი კანონის მიხედვით, საკმარისი იყო, ვინმეს პიროვნებისთვის ხელი დაედო, ეგრევე ასამართლებდნენ და ციხეში სვამდნენ. რატომ გაჩნდნენ საქართველოში პოლიტპატიმრები? ხალხს დანაშაული არ ჰქონდა ჩადენილი და ერთი მოწმის ჩვენების საფუძველზე აპატიმრებდნენ. თუ ადეიშვილის ნათქვამს არაიურისტი მოისმენს, შეიძლება ვერც მიხვდეს, რასთან გვაქვს საქმე და მართლა პატიოსანი ეგონოს. ბოკერიას, რამიშვილისა და ადეიშვილის სამართალი იყო ასეთი: ამან თქვა, იმას ხელი დაადო, მორჩა კინო. საერთოდ, ქრთამი, რომელიც ძალიან რთული დასამტკიცებელია, ასეთ საქმეებზე მაგათ 5-10 წლის წინანდელი ვითომ დანაშაულები ამოქექეს. ესე იგი, 2003-ში მოვიდნენ, ვიღაცებს ათქმევინეს, 10 წლის წინ მავანს და მავანს ქრთამი მივეცითო და ხალხი დააპატიმრეს. ამის შემდეგ მიდიოდა ადამიანების წამება, ქონების "ახევა" და საპროცესოების გაფორმება. ჯერ კიდევ 1937-იან წლებში სტალინმა თქვა, აღიარება მტკიცებულების დედააო და მას შემდეგ მსგავსი მეთოდები გამოიყენა მხოლოდ ადეიშვილის პროკურატურამ. მეტიც, ამ მეთოდებით სააკაშვილის რეჟიმის დროს პროკურორებისა და გამომძიებლების მთელი თაობა გაიზარდა, რომელიც დღესაც მოღვაწეობს და ყველა ძალიან კარგად გრძნობს თავს.

რომ ამოვიღოთ მაშინდელი და ახლანდელი საპროცესო გარიგებები, აღმოვაჩენთ ერთ საინტერესო ფაქტს: დავუშვათ, დაიჭირეს ორი პიროვნება თაღლითობაზე, ერთი წარსულში ნასამართლევია, მეორე - სუფთაა. პირველს უფარდებენ საპროცესო შეთანხმებას, მეორეს - არა. როგორ ფიქრობთ, რა მოვლენასთან გვაქვს საქმე? ამას ჰქვია შერჩევითი მართლმსაჯულება. ესე იგი, მოსამართლეს და პროკურორს ერთ შემთხვევაში მოუნდათ, მეორე შემთხვევაში არ მოუნდათ. რატომ მოუნდათ, ან არ მოუნდათ? კანონში არაფერი წერია, ამათ რომ მოვთხოვოთ პასუხი! კი, ბატონო, ესეც დაამკვიდრა სააკაშვილის რეჟიმმა, მაგრამ შენ რომ მოდიოდი, ხომ მპირდებოდი, რომ შეცვლიდი და კანონს გამართავდი?! ადეიშვილი ყველაფერს ილაპარაკებს, რატომაც არა? აგერ, სარიშვილი, წერეთელი და ვიღაცები გამოდიან, პირდაპირ ამბობენ, ამ ხალხს დაუმტკიცეთ დანაშაული, რატომ ვერ უმტკიცებთო? ხედავთ, რას ამბობს ადეიშვილი? მე მსხვერპლი ვარო. კი, მსხვერპლია, ჩვენ ვძალადობდით მაგ ადამიანზე და ახლა რომ ვლაპარაკობ, ძალადობას ვაგრძელებ. სააკაშვილიც მსხვერპლია და ახალაიაც. ახლა აქეთ გვიკითხავენ მორალს, ჩვენ ციხეებში წამების ორგანიზატორები დავაპატიმრეთ და ივანიშვილმა კიდევ გამოუშვაო. ეს იმას გულისხმობს, სპექტაკლი რომ დადგეს და ვიღაცები დაიჭირეს. მერე შოუ გაუსკდათ, სანამ ციხის კადრები გახმაურდებოდა. ადეიშვილი ნუ ნერვიულობს, ნამდვილ კადრებში ვინც ფიგურირებს, ყველა დაკავებულია. სამწუხაროდ, ეს ხელისუფლება ამაზეც არ ლაპარაკობს, გამოიტანონ საქმეები და გაასაჯაროვონ"

წყარო :