ჟურნალისტი ნინო კვაჭანტირაძე სოციალურ ქსელში ფოტოს აქვეყნებს და წერს:

„კარგად დაბნელებული იყო, დიღმის მასივში მაიაკოვსკის სკვერის გავლით სახლში ვბრუნდებოდი. გაჩახჩახებული ლამპიონები, ჩართული შადრევანი, შემოდგომის ბაღი, სკამებზე აქა-იქ მომყუდროებული წყვილბიც ისხდნენ. მოკლედ, ძაან პოეტურ ხასიათზე დავდექი, წატრაბახებაც კი მომინდა- აბაა? ეს მშვენიერი ბაღი ჩემმა სამსახურმა გააკეთა თქო, მაგრამ ვინ დამაცადა. სად იყო და სად არა ძაღლიანმა ქალმა ჩამიარა და რას ვხედავ - მწვანე ბუჩქს მიაფხოკიალებს. აუუ, ვიცანი, ჩვენების დარგული ღვია იყო და ვეკვეთე ქალს:

- ახლავე წამოდი და სადაც მოთხარე იქვე ჩარგე, ეგ ბუჩქი.

- რა გინდა ქალოო, რა ბეტეერივით დამეტაკე.

- რა და, დაგინახე. როგორ ამოთხარე, ახლავე პატრულს დავურეკავ...

- რა პატრული?

- ვეტყვი, რომ მოიპარე.

-აა, ახლა ქურდიც გამომიყვანე არაა? ამოვთხარე რა, კი არ დამიმტვრავია?! მიმაქ, ჩემს ეზოში დავრგავ, ვააა, გიჟი ხარ ვიღაცა...

- ეს ბაღიც შენი არაა, აბა ვისია?

- კაი, ახლა აქ მაინც არ გააჩერებენ, სხვები მოთხრიან.

სერიიდან ვაი, ჩვენს პატრონს..."