გაერო-ს ბავშვთა ფონდის მიერ გავრცელებული ინფორმაციით, სირიაში ავიადარტყმის შედეგად 22 ბავშვი და 6 პედაგოგი დაიღუპა.

იუნისეფ-ის ცნობით, ავიადარტყმა სირიის ჩრდილოეთში, პროვინცია იდლიბის ერთ-ერთი სოფლის სკოლაზე განხორციელდა. აღნიშნულ სოფელს ამჟამად აჯანყებულები აკონტროლებენ.

იუნისეფ-ის აღმასრულებელი დირექტორის ენტონი ლეიკას განცხადებით, თუ დარტყმა მიზანმიმართულად განხორციელდა, ეს სამხედრო დანაშაულია.

„ეს ტრაგედია და ძალადობაა. თუ დარტყმა მიზანმიმართულად განხორციელდა, ეს სამხედრო დანაშაულია", - განაცხადა ენტონი ლეიკამ.

სირიის სახელმწიფო მედიის ცნობით, აღნიშნულ ტერიტორიაზე ავიადარტყმა „ტერორისტების" პოზიციებზე განხორციელდა.

მომხდარს გაერო-ში რუსეთის მუდმივი წარმომადგენელი ვიტალი ჩურკინი გამოეხმაურა და ინფორმაციას „შემზარავი" უწოდა.

„ვიმედოვნებ, რომ ჩვენ არაფერ შუაში ვართ", - განაცხადა ვიტალი ჩურკინმა.