„მსახიობებს ვთხოვ, ვის გაქვთ სურვილი, რომ რამდენიმე დღით წამოხვიდეთ საინგილოში და ამ არაჩვეულებრივ დასს მეტყველების მასტერკლასები ჩაუტაროთ?" - წერს თეატრმცოდნე ნიკოლოზ წულუკიძე სოციალურ ქსელში.

„ღია წერილი სრულიად ქართულ თეატრს

დღეს ვიმყოფებოდი ჰერეთში (საინგილოში) აზერბაიჯანის რესპუბლიკის სოფელ ალიბეგლოს დრამატულ ქართულ სახელმწიფო თეატრში, სადაც დავესწარი ორი სპექტაკლის პრემიერას (იაკობ გოგებაშვილის „იავნანამ რა ჰქმნა" და თამრი ბართაიას „მუყაოს სახლები"). ნანახმა ყოველგვარ მოლოდინს გადააჭარბა, გავოგნდი, თუ რა პირობებში უწევთ მსახიობებს მუშაობა, როგორი ენთუზიაზმით ეკიდებიან საყვარელ პროფესიას და საერთოდ, როგორი მაგარი ქართველები არიან.

ამ ხალხს სწორედ ახლა სჭირდება დახმარება და თეატრს გადარჩენა!!! პირველ რიგში, რაც ყველაზე მთავარია, უნდა შევუგროვოთ სათეატრო და ქორეოგრაფიული კოსტიუმები. ახალი სპექტაკლების დასადგმელად. ძვირფასო თეატრის ხელმძღანელებო, არც კი იცით, როგორ დაეხმარებით საინგილოს ქართულ თეატრს, რეპერტუარიდან მოხსნილი სპექტაკლების კოსტიუმების შეგროვებით. ხვალიდან ტანსაცმელს, თეატრალურ ლიტერატურასთან ერთად შევაგროვებთ თეატრალური უნივერსიტეტის მეორე კორპუსში, დავით აღმაშენებლის გამზირი 40, გამომცემლობა „კენტავრში". იკითხეთ მაკა ვასაძე, ავთანდილ ვარსიმაშვილი, ეკატერინა მაზმიშვილი, დიმიტრი ხვთისიაშვილი, ქეთი დოლიძე, დათა თავაძე, ია შერაზადიშვილი, ამირან შალიკაშვილი, ნინო გალეგაშვილი, ნატალია თვალჭრელიძე, ირაკლი გოგია, იოსებ ბაკურაძე, ნინო ანანიაშვილი, სანდრო მრევლიშვილი, ანუკი კვინიკაძე, ანდრო ენუქიძე, გიორგი შალუტაშვილი, ნინო ლიპარტიანი, პაატა გულიაშვილი, ვასო ჩიგოგიძე, ნანა წერეთელი, თენგიზ ხუხია, სოსო ნემსაძე, ზვიად დოლიძე, ლია სულუაშვილი, თორნიკე მარჯანიშვილი, მაია პაკსაშვილი, ზაზა თედიაშვილი.

ახლა მსახიობებს ვთხოვ, ვის გაქვთ სურვილი, რომ რამდენიმე დღით წამოხვიდეთ საინგილოში და ამ არაჩვეულებრივ დასს მეტყველების მასტერკლასები ჩაუტაროთ?

ხომ შეიძლება, ასეთმა უმნიშვნელოვანესმა საქმემ ცოტა ხნით მაინც გააერთიანოს ქართული თეატრი. თბილისში გამომგზავრების დროს თეატრის თანამშრომელმა, ქალბატონმა ლიანამ მკითხა - საქართველოს მოსახლეობის რამდენმა პროცენტმა იცის ჩვენი არსებობაო?... მოდით, ყველამ ერთად გავაგებინოთ, რომ ჩვენ არათუ მათ არსებობაზე, არამედ მათ მომავალზეც ვფიქრობთ!!!

სიყვარულით, თვენი ნიკა წულუკიძე", - წერს წულუკიძე „facebook"-გვერდზე.