ერაყში, ქალაქ ტიკრიტსა და სამარაში ორი თვითმკვლელის მიერ ორგანიზებული ტერაქტის შედეგად 11 ადამიანი დაიღუპა.

ტიკრიტში, რომელიც დედაქალაქ ბაღდადიდან 160 კილომეტრში მდებარეობს, თვითმკვლელმა სასწრაფო დახმარების მანქანა ააფეთქა. სამართალდამცველების ცნობით, შედეგად 9 ადამიანი დაიღუპა.

სამარაში ტერორისტის ქმედება შიიტი მომლოცველების წინააღმდეგ იყო მიმართული, რასაც 2 ადამიანის სიცოცხლე ემსხვერპლა. ტერაქტების გააქტიურებას ერაყში სახელისუფლებო ძალების მიერ მოსულისთვის წარმოებულ ოპერაციებს უკავშირებენ.