„ქართული ანბანის სამი სახეობის ცოცხალი კულტურა" UNESCO-ს კაცობრიობის არამატერიალური კულტურული მემკვიდრეობის წარმომადგენლობით ნუსხაშია.

გადაწყვეტილება 30 ნოემბერს, ეთიოპიის დედაქალაქ ადის-აბებაში UNESCO-ს არამატერიალური მემკვიდრეობის მთავრობათაშორისმა კომიტეტმა მე-11 სესიაზე მიიღო.

აღნიშნული ნომინაცია საქართველოს მთავრობისა და კულტურისა და ძეგლთა დაცვის სამინისტროს მხარდაჭერითა და საქართველოს კულტურული მემკვიდრეობის დაცვის ეროვნული სააგენტოს ხელმძღვანელობით მომზადდა, ხოლო ნომინაციის მხარდაჭერა საერთაშორისო დონეზე უზრუნველყო საგარეო საქმეთა სამინისტრომ. 2015 წლის 19 მარტს, „უძველესი ქართული ანბანის სამი სახეობის ცოცხალ კულტურას" არამატერიალური მემკვიდრეობის ეროვნული ძეგლის სტატუსი მიენიჭა.

ქართული ანბანი UNESCO-ს არამატერიალური კულტურული მემკვიდრეობის ნუსხაში მესამე ნომინაციაა. აქამდე ეს სტატუსი ქართულ ფოლკლორსა და ქვევრის ღვინის დაყენების მეთოდს ჰქონდა.

არამატერიალური კულტურული მემკვიდრეობის დაცვის კონვენცია UNESCO-მ 2003 წელს მიიღო. არამატერიალური საგანძურის სიაში შედის: ხალხში გავრცელებული ზეპირი გადმოცემები, ტრადიციული მუსიკა, ცეკვა, ინსტრუმენტები, საგნები, არტეფაქტები, რიტუალები, ფესტივალები, ხალხური რეწვა, ადათ-ჩვევები, კულტურული სივრცეები და სხვა.