დღეს სახელმწიფო უსაფრთხოების და კრიზისების მართვის საბჭოს ეროვნულ სიტუაციურ ცენტრში დასრულდა ანალიტიკური კურსი, რომელიც სახელმწიფო უსაფრთხოებისა და კრიზისების მართვის საბჭოს აპარატისა და საქართველოში დიდი ბრიტანეთის და ჩრდილოეთ ირლანდიის გაერთიანებული სამეფოს საელჩოს ორგანიზებით ჩატარდა.

ანალიტიკური კურსი 21 ნოემბერს დაიწყო და მასში  საქართველოს სხვადასხვა უწყების წარმომადგენლები მონაწილეობდნენ. სასწავლო კურსის მიზანი იყო ანალიტიკური მუშაობის თანამედროვე გამოცდილების გაცნობა და უწყებებს შორის კოორდინირებულად მუშაობის გაუმჯობესება. კურსს ბრიტანელი ანალიტიკოსი ჯოანა ტიდემანია ხელმძღვანელობდა.

დიდი ბრიტანეთისა და ჩრდილოეთ ირლანდიის გაერთიანებული სამეფოს ელჩმა ჯასტინ მაკკენზი სმიტმა და სახელმწიფო უსაფრთხოებისა და კრიზისების მართვის საბჭოს მდივნის მოადგილემ ლევან ღირსიაშვილმა კურსის მონაწილეებს სერტიფიკატები გადასცეს და ანალიტიკური კურსის წარმატებით დასრულება მიულოცეს.