„ფოტორეპორტიორების საქმის" ფიგურანტმა გიორგი აბდალაძემ, შესაძლოა, მორალური და ფსიქოლოგიური ზიანის ასანაზღაურებლად სახელმწიფოსგან კომპენსაცია მოითხოვოს. ამის შესახებ „პირველს" აბდალაძემ განუცხადა.

გიორგი აბდალაძემ საქართველოს მთავარი პროკურატურის მუშაობით კმაყოფილია და აცხადებს, რომ საქმის გახსნით, „სახელმწიფომ ფაქტობრივად ბოდიში მოიხადა".

„დღეს, სახელმწიფომ ფაქტობრივად ბოდიში მოგვიხადა იმის გამო, რომ უდანაშაულო ადამიანები საპატიმროში ვიყავით და აბსურდული ბრალდება გვქონდა წაყენებული - გვაღიარებინეს ის, რაც არ ჩაგვიდენია. იმედი გვაქვს, რომ სასამართლო პროცესი მალე დაიწყება. ახლა სასამართლომ უნდა მიიღოს გადაწყვეტილება. რაც შეეხება კომპენსაციას, პირველ რიგში სამსამართლომ უნდა გვცნოს უდანაშაულოდ. შესაძლოა, სახელმწიფოსგან მოვითხოვო კომპენსაცია, თუმცა, წინასწარ ვერაფერს გეტყვით. სასამართლოებზე სიარულს ვაპირებ და ყველა იმ ჟურნალისტის იმედი  მაქვს, ვინც ამ საქმეს აშუქებდა. პროცესებზე ბევრი ისეთი ფაქტი გაირკვევა, რაც წინა ხელისუფლების დანაშაულს კიდევ ერთხელ გამოააშკარავებს",- განუცხადა „პირველს" გიორგი აბდალაძემ.

„ფოტორეპორტიორების საქმის" ფიგურანტების მიმართ გამოტანილი გამამტყუნებელი განაჩენის გადასინჯვასა და მათ მიმართ გამამართლებელი განაჩენის დადგომას მოითხოვს სააპელაციო სასამართლოში მთავარი პროკურატურა.

საქართველოს მთავარ პროკურატურაში გამართულ ბრიფინგზე ცნობილი გახდა, რომ ე.წ. „ფოტორეპორტიორების საქმეზე", ძალადობით და დაზარალებულის პირადი ღირსების შეურაცხყოფით განხორციელებული სამსახურებრივი მდგომარეობის გადამეტების ფაქტზე საქართველოს შსს კონტრდაზვერვის დეპარტამენტის ქ.თბილისის ტერიტორიული სამმართველოს უფროსის ყოფილი მოადგილე დავით დევნოზაშვილი დააკავეს, ხოლო სასჯელაღსრულების დაწესებულების N8 საპყრობილის ყოფილი დირექტორის ალექსანდრე მუხაძის მიმართ გამოტანილ იქნა დადგენილება მისი ბრალდების შესახებ.

„პროკურატურის მიერ მიღებულ იქნა გადაწყვეტილება ფოტორეპორტიორების: გიორგი აბდალაძის, ზურაბ ქურციკიძის, ირაკლი და ნათელა გედენიძეების მიმართ გამოტანილი გამამტყუნებელი განაჩენების გადასინჯვის თაობაზე და პროკურატურა მათ მიმართ თბილისის სააპელაციო სასამართლოში გამამართლებელი განაჩენების დადგომას მოითხოვს.

აღნიშნულ საქმეზე საქართველოს მთავარი პროკურატურა აგრძელებს გამოძიებას ამ დანაშაულში ჩართული სხვა მაღალი რანგის თანამდებობის პირების გამოსავლენად.

გარდა ამისა, უკანონოდ გასამართლებული ზურაბ ქურციკიძის, გიორგი აბდალაძის, ირაკლი და ნათელა გედენიძეების მიმართ პროკურატურის მიერ გამოტანილია დადგენილებები მსჯავრდებულის უფლების არსებითად დარღვევის თაობაზე, რის საფუძველზეც ჩვენ მივმართავთ თბილისის სააპელაციო სასამართლოს ახლადგამოვლენილ გარემოებათა გამო განაჩენების გადასინჯვის მოთხოვნით",- აცხადებენ საქართველოს მთავარ პროკურატურაში.

4 ფოტოგრაფი - ევროპის პრესფოტოს სააგენტოს ფოტოგრაფი ზურაბ ქურციკიძე, პრეზიდენტის პირადი ფოტოგრაფი ირაკლი გედენიძე, მისი მეუღლე, „პრაიმტაიმის" ფოტორეპორტიორი ნათია გედენიძე და საგარეო საქმეთა სამინისტროს პრესამსახურის ფოტოგრაფი გია აბდალაძე 2011 წლის ივნისში ჯაშუშობის ბრალდებით დააკავეს, თუმცა საქმეზე საიდუმლო გრიფის არსებობის გამო საზოგადოებამ ვერ გაიგო, ვის სასარგებლოდ ჯაშუშობა ედებოდათ ბრალად დაკავებულებს. კიდევ ერთი ფოტოგრაფი, „ასოშეიტედ პრესის" თანამშრომელი შაჰ აივაზოვი, რომელიც, ასევე, წაიყვანეს სამართალდაცავებმა შინაგან საქმეთა სამინისტროში, რამდენიმე საათში გაათავისუფლეს.

რამდენიმეკვირიანი პატიმრობისა და ხმაურიანი საპროტესტო აქციების შემდეგ, ბრალის აღიარების სანაცვლოდ ისინი საპროცესო გარიგებით გაათავისულეს. მოგვიანებით, 2012 წლის საპარლამენტო არჩევნების შემდეგ, მათ  პირობითი მსჯავრი და ნასამართლობა მოეხსნათ.