- +

 

 

„სამეურვენო საბჭოს თავმჯდომარემ არ იცის, რომ ნარკოლოგიური შემოწმების ცნობა არის საჭირო. მაშინ თუ არ იცი, წადი სახლში. ე.ი. მენეჯმეტში არ ვარგიხარ", - აცხადებს „საზოგადოებრივი მაუწყებლის" ჟურნალისტი, გიორგი ფოფხაძე, რომლის განცხადებით, არსებულმა მენეჯმენტმა პრაქტიკულად ჩამოშალა ტელევიზია. ჟურნალისტი მიმართავს ხელისუფლებას, დაინტერესდნენ სად და რაში იხარჯება 47 მილიონი.

 

- „მორფინისტი" რომ არ გვინდა „საზოგადოებრივი მაუწყებლის" დირექტორად, ალბათ ნებისმიერს ესმის", - აცხადებს „აიპრესთან" საუბრისას სამეურვეო საბჭოს თავმჯდომარე გრიგოლ გოგელია, რომლის გადაწყვეტილებით, მაუწყებლის დირექტორის თანამდებობის დასაკავებლად ნარკოლოგიური შემოწმების ცნობა საჭირო აღარ არის. ეს მაშინ, როდესაც მოქმედი კანონმდებლობით სამედიცინო-ნარკოლოგიური შემოწმების ცნობის წარდგენა სავადებულოა. „საზოგადოებრივი მაუწყებლის" შემთხვევაში რატომ არ არის სავალდებულო ნარკოლოგიური შემოწმების ცნობა?

- სამწუხაროდ, ტრადიციულად ბოლო 10-12 წელია ძალიან უცნაური რაღაცეები ხდება„საზოგადოებრივ მაუწყებელში". ყველაფერ იმ სისულელესთან ერთად, რაც ამ ტელევიზიამ ბოლო წლებში გააკეთა, ჩემთვის არ იყო გასკვირი სამეურვეო საბჭოს გადაწყვეტილება. ვხუმრობდი კიდეც, ბარემ საზოგადოებრი მაუწყებლის დირექტორს დიპლომიც არ მოვთხოვოთ, უფრო ლიბერალური და დემოკრატიული იქნება.

ისეთი ვინმე მოვიყვანოთ, რომელსაც არ ექნება განათლება, მაგრამ იქნება მარიხუანას მომხმარებელი და ის ააწყობს ტელევიზიას. ჩემთვის, როგორც ჯერ-ჯერობით ამ ტელევიზიის ჟურნალისტისთვის, სამარცხვინოა, რაც ხდება. არ ვიცი, აბა რა გითხრათ. ბოლო წლების განმავლობაში ამ ტელევიზიაში ისეთი რაღაცეები ხდება, რომ ეს გადაწყვეტილება ჩემთვის ნამდვილად არ იყო გასაკვირი.

 

- და რა ხდება „საზოგადოებრივ მაუწყებელში", შეიგიძლიათ დააკონკრეტოთ?

- არსებულმა მენეჯმენტმა პრაქტიკულად ჩამოშალა ტელევიზია. რაც არ უნდა ილაპარაკოს ჩვენმა პრემიერ-მინისტრმა, რომ საზოგადოებრივი მაუწყებელი არის კრიტიკული, ბატონ პრემიერს მინდა ვუთხრა და ვურჩიო შემდეგისთვის გაითვალისწინოს  რომ, კრიტიკა არ არის ჟურნალისტიკის და მედიასაშუალების შეფასების და ავკარგიანობის კრიტერიუმი. კრიტიკა შეიძლება იყოს უსაფუძვლოც და დაუსაბუთებელიც. ჟურნალისტიკის და მედიასაშუალების შეფასების კრიტერიუმი არის მისი სანდოობა, რამდენად ენდობა მაყურებელი ამა თუ იმ მედია საშუალებას და რამდენად ენდობა მის მიერ გავრცელებულ ინფორმაციას? დავსვათ კითხვა - რამდენი ადამიანი ენდობა დღეს საქართველოში საზოგადოებრი მაუწყებლის მიერ გავრცელებულ ინფორმაციას?

- საკმაოდ დაბალია 0,5-ია „საზოგადოებრივი მაუწყებლის" რეიტინგი. გარდა ამისა, საქართველოს მთელ რეგიონებში და ასევე თბილისშიც კი არის ადგილები, სადაც  „საზოგადოებრივი მაუწყებელი" ვერ ფარავს,  რაც კიდევ ცალკე პრობლემაა...

- უფრო მეტს გეტყვით. თუ შეხვალთ საზოგადოებრივი მაუწყებლის ვებ გვერდზე  ჩვეულებრივი კომპიუტერიდანაც ძალიან ძნელად იხსნება მაუწყებლის ინტერნეტგვერდი. საზოგადოებრივი მაუწყებლის ფორმატიც და საიტიც ისეთია, რომ ვერანაირ კრიტიკას ვერ უძლებს. როდესაც გიორგი ბარათაშვილი გადადგა, მაშინ ვთქვი, რომ მენეჯმენტიც  სახლში უნდა წაბრძანდეს-თქო. მაშინ შემხვდა ბატონი გოგელია და მეუბნება ასეთ რაღაცას - „რატომ გაგვაკრიტიკე, რომ სახლში უნდა წავიდეთო". იმიტომ უნდა წახვიდეთ, ბატონებო, სახლში, რომ თქვენ ვერ გაამართლეთ! მითხარით გავს ეს ტელევიზია, ტელევიზიას? მთელი უბედურება ის არის, რომ 47 მილიონი ლარის დაფინანსების ტელევიზიას გაცილებით დაბალი რეიტინგი აქვს, ვიდრე დავუშვათ და  გუშინ შექმნილ ტელეკომპანია „პირველს".

- რაშია რეალურად პრობლემა, მხოლოდ მეჯმენტია ამ შემთხვევაში დამნაშავე?

- ბოლო რეორგანიზაციის შემდეგ მენეჯმენტმა მხოლოდ ლოგო და ფერები შეცვალა, სხვა არაფერი არ შეცვლილა. დამიჯერეთ, ნუგზარ ფოფხაძემ 1978 პარკეტი რომ დააგო და კედლები შეღება, ის მდგომარეობაა დღესაც ამ ტელევიზიაში. არაფერი მას მერე არ შეცვლილია, ეკოლოგიურად საშიში ტელევიზიაა. რა თქმა უნდა რომ,  მენეჯმენტის ბრალია ეს ყველაფერი, მათ ვერ შეძლეს არხი გამხდარი ყურებადი, წარმატებული, რომ არხს მაყურებელი მოეზიდა. მაყურებლის მოზიდვა ზოგჯერ ცუდ ტელევიზიასაც შეუძლია, მაგრამ ამათ ესეც ვერ შეძლეს. წარმოგიდგენიათ, რა დღეშია საზოგადოებრივი მაუწყებელი?!

მოვიდა საინფორმაციო დეპარტამენტის  ახალი ხელმძღვანელი ბატონი გვიმრაძე, რომელსაც მანამდე არავითარი შეხება ტელევიზიასთან არ ჰქონია. მისი ტელევიზიასთან შეხება იყო ასეთი - საღამოს მივიდა სახლში, გაიხადა ტუფლები, ჩაიცვა ჩუსტები, დაჯდა დივანზე და ჩართო ტელევიზორი. სულ ეს იყო გვიმრაძის შეხება ტელევიზიასთან ამ თანამდებობაზე დანიშვნამდე. როდესაც ასეთი კადრი მოგყავს, რა თქმა უნდა, ტელევიზიის საინფორმაციო პოლიტიკა  იქნება ძალიან ცუდ მდგომარეობაში. შედეგიც სახეზე გვაქვს. სიენენს არ აქვს იმხელა დაფინანსება, რამხელაც აქვს საზოაგდოებრივ მაუწყებელს და, რაც საინტერესოა, არხზე სულ რეორგანიზაცია მიდის.

- საინტერესოა რასთან არის დაკავშირებული ეს მუდმივი რეორგანიზაცია?

- წარმოიდგინეთ, რომ 47 მილიონი ლარის დაფინანსების ტელევიზას არ აქვს სამკერდე მიკროფონზზე ეგრეთ წოდებულ „პეტლიჩკაზე" დასამაგრებელიც კი  და დღემდე „სკრეპით" ვამაგრებთ სტუმრად მოსულ რესპოდენტებს? კამერა კამერას არ გავს და მიკროფონი - მიკროფონს, იცით როგორი გაცვეთილია აპარატურა?!

- სად მიდის მაშინ ეს თანხა?

- არ ვიცი. ზუსტად ეგ კითხვა მებადება მეც, სად მიდის ამდენი ფული? ეხლახან წავიკითხე, რომ ახალი ნიუსრუმის გაკეთებაზე 20 მილიონი ლარი დაიხარჯა, შეიქმნა საიტი სხვადასხვა ფერებით, მოიტანეს წითელი ფერის მიკროფონის ქუდები, წითელი ფერის  ჟურნალისტების და ოპერატორების ჟილეტები რომლებსაც არავინ იცვამს. ამაში დაიხარჯა 20 მილიონი? ვერ გავიგე!!!  იცით, რომ 50 კაცი ერთდროულად ვერ უყურებს საზოგადოებრივი მაუწყებლის ვებგვერდზე პირდაპირი ეთერს?  - ჭედავს! კიდევ კარგი, რომ მაღალი ყურდებადობა არ აქვს არხს თორემ....

- ტელევიზიას, რომლის ბიუჯეტი 47 მილიონია, აქვს ძალიან ბევრი პრობლემები. როგორ ფიქრობთ, გამოძიების საფუძველი არ უნდა გახდეს ეს საკითხი?

- ზუსტად არ ვარ ჩახედული, მაგრამ ვიცი, რომ საზოგადოებრივი მაუწყებლის პროფკავშირმა მოითხოვა ჩატარებულიყო მოკვლევა - სად წავიდა ეს თანხები. თუ მართლაც ასეა, რაც გააჟღერა პროფკავშირებმა, მაშინ აუცილებლად საჭიროა ჩატარდეს მოკვლევა, რადგან ჩვენ, ჟურნალისტებს, სულ გვეუბნებიან, რომ ფული არ აქვთ. აგერ, ბატონო - ჩემს შემთხვევაში გამიფორმეს ახალი კონტრაქტი, სადაც პირდაპირ დარღვეულია შრომითი კანონმდებლობა.

 

- რას გულისხმობთ?

- მე მქონდა ერთწლიანი კონტრაქტი, მაგრამ შრომის კანონმდებლობის დარღვევით გამიფორმეს 3-თვიანი კონტრაქტი. სახელფასო პირობებიდან, გადამიყვანეს გამომუშავებაზე. ანუ უშტატოზე გადამიყვანეს, რაც შრომის კანომდებლობის დარღვევაა. შრომის კანონმდებლობის დარღვევაა ისიც, რომ მივლინების თანხა შემიწყვიტეს. მე ვითვლები საქართველოს ტელევიზიიდან ბრიუსელში მივლინებულ ჟურნალისტად, ამიტომ, საქართველოს პრეზიდენტის ბრძანებულების საფუძველზე წესით და კანონით როგორც გრძელვადიან მივლინებაში მყოფ საქართველოს მოქალაქეს მეკუთვვნის ყოველდღიური სამივლინებო თანხა, რომელიც ახალი კონტრაქტის თანახმად კანონდარღვევით შემიწყვიტეს. ასევე შრომის კანონის თანახმად, მივლინებულ ჟურნალისტებს უნდა გვიხდიდნენ ბინის ქირას, რასაც ასევე არ გვაძლევენ არც მე და არც ჩემს ოპერატორს. უკვე მესამე წელია ბინის ანაზღაურებას ვითხოვ და გიორგი ბარათაშვილისთვის რომ გეკითხათ, ყოველი თვის ბოლოს მპირდებოდა ამ საკითხის მოგვარებას...

- საზოგადოებრივი მაუწყებელს ორი ჟურნალისტი ჰყავს ბრიუსელში, თქვენ და ქეთევან ქარდავა, მასთან დაკავშირებითაც იგივე ხდება?

- დიახ, ჩვენ ორი ჟურნალისტი ვართ ბრიუსელში, მე და ქეთევან ქარდავა, მას უხდიან ბინის თანხას, ხანგრძლივი მივლინების ანაზღაურებას ასევე - გადაადგილების თანხას. სწორედ ამაშია კიდეც კანონის დარღვევა ორი ერთანაირ პირობებში მომუშავე ჟურნალისტი ერთანირი პირობებით უნდა სარგებლობდეს... სამწუხაროდ ჩემზე ეს პირობები არ ვრცელდება

- თქვენ შემთხვევაში რატომ თქვეს უარი?

- არ ვიცი. ჯერ ბატონმა გვმრაძემ ბრძანა რომ, მე თურმე ჩემზე დაკისრებულ მოვალეობებს არ ვასრულებდი... მერე თქვა, რომ ორი ჟურნალისტის შენახვა არხს არ შეეძლო ბრიუსელში. როცა მე ავხმაურდი ამ თემაზე, ისევ შეცვალეს გადაწყვეტილება და უშტატო თანამშრომლის სამთვიანი კონტრაქტი შემომთავზეს. სიმართლე გითხრათ, 6 თვის განმავლობაში საზოგადოებრივ მაუწყებელს საკუთარი ინიციატივით  მივლინებაში არ გავუგზავნივარ, არც ერთი სიუჟეტი არ გამიკეთებია რედაქციის მითითებით და დავალებით, პირიქით - თუ რამეს შესთავაზებ ან არ უნდათ, ან უკვე გაგზავნილია სხვა ჟურნალისტი ამ თემის გასაკეთებლად.  პირიქით, მე ვიგონებდი რეპორტაჟებს და ვთავაზობდი, უკვე კულტურაზე გადავედი - ხან ნოსტრადამუსის სახლ-მუზეუმიდან გავაკეთე რეპორტაჟი, ხან ფრანგული ყველის წარმოებაზე და ხან ბელგიის დროშის ფერებზე.

 

- წესით გვიმრაძე არ უნდა წყვეტდეს კადრების დანიშვნა გათავისუფლების საკითხებს და არხის ხელმძღვანელობასთან არ გაარკვიეთ?

- არხის ხელმძღვანელობამ ვერ ამიხსნა. რატოღაც მხოლოდ და მხოლოდ ჩემს შემთხვევაში იშვერენ ხელს ბატონი გვიმრაძისკენ. აჰაა, მიდი იმასთან და იმან გადაწყვიტოს ყველაფერიო. სასაცილოა...  მე მიშვებენ არხიდან, ადამიანს, რომელიც 15 წელია ევროკავშირში ვმუშაობ ვიყავი წამყვანი ევროპული მედიასაშუალებების წარმომადგენელი ევროსტრუქტურებში. ვლაპარაკობ ევროკავშირის 4 ოფიციალურ ენაზე, ვიცნობ უამრავ ევროჩინოვნიკს და ექსპერტს... და საზოგადოებრივი მაუწყებელი იმის მაგივრად, რომ ასეთ ჟურნალისტს ეძებდეს, ყველაფერს აკეთებენ იმისთვის რომ არხიდან წავიდეს

- რატომ დათანხმდით ამ კონტრაქტს?

- დავთანხმდი იმიტომ, რომ მე სხვა გამოსავალი არ მქონდა. წასვლას ყოველთვის დარჩენა ჯობს, ვცდილობ შეიცვალოს რაღაც... რომ წავსულვიყავი, უკვე კადრების სიიდან ამომიღებდნენ და ამიტომ მოვაწერე ხელი. მაგრამ არ ვაპირებ გაჩუმებას, ავტეხავ ხმაურს როგორც საქართველოში, ასევე - ევროპაში. მე ვარ ჟურნალისტთა საერთაშორისო კავშირისა და ჟურნალისტთა საერთაშორისო პროფკავშირის წევრი. მივმართავ ამ ორგანიზაციებს, რომ აღმომიჩინონ დახმარება იმიტომ, რომ აქ უკვე დარღვეულია საქართველოს შრომითი კოდექსი. საზოგადოებრივმა მაუწყებელმა გააკეთა ის, რისი გაკეთების უფლებაც არ ჰქონდა.

სამწუხაროდ, ერთადერთი ქართველი ჟურნალისტი ვარ, რომელმაც იმუშავა ევროპულ წამყვან მედიაში, მათ შორის - საფრანგეთის საზოგადოებრივ მაუწყებელში და რადიოში, იქ ბორდი ხელფასს არ იღებს, იქ ბორდი არ ერევა ტელევიზიის შიდა პრობლემებში. იქ ბორდი ცოტა სხვა რაღაცაა. სხვათა შორის, როდესაც ახალი მთავრობა მოდის, მენეჯმენტი მიდის ტელევიზიიდან, როგორც ეს ბარათაშვილმა გააკეთა.

თუ ვინმე კითხულობს, რატომ წავიდა ბარათაშვილი, ალბათ წავიდა იმიტომ, რომ მოვიდა ახალი მთავრობა და ჩათვალა საჭიროდ, რომ გადამდგარიყო, ეს ჩემთვის ნორმალური მოვლენაა. მაგრამ ბარათაშვილს ავტომატურად უნდა გაყვეს მენეჯმენტი. ასე არ შეიძლება - შენ რომ ამხელა დაფინანსებიდან ვერ გააკეთე ყურებადი ტელევიზია, კეთილი უნდა ინებო და წახვიდე. ამაშია მთელი პრობლემა. ტელევიზიას ჰყავს პროფესიონალი ჟურნალისტები, მაგრამ არ ჰყავს პროფესიონალი მენეჯმენტი.

 

- უკაცრავად შეკითხვისათვის და თქვენ თავის დროზე დიდი როლი შეასრულეთ იმაში რომ, გიორგი გვიმრაძის წინააღმდეგ აგორებული კამპანია მისი დანიშვნის შესახებ შეგეჩერებინათ, და შესძელით კიდეც ეს, გვიმრაძე თქვენ უნდა გიმადლოდეთ რომ დღეს ამ - სავარძელში ზის, თუ ის ასეთი არაპროფესიონალი იყო, მაშინ რატომ არ ამოიღეთ ხმა და ამბრაზურასავით გადაეფარეთ?

- გეთანხმებით, რომ გიორგი გვიმრაძის ამ თანამდებობაზე დატოვებაში და იმ კამპანის შეჩერებაში მე მართლაც გადამწყვეტი როლი მიმიძღვის, მაშინ გიორგი ბარათაშვილმა მთხოვა დახმარება და მითხრა, რომ გიორგი გვიმრაძეს ჰქონდა მონაწილეობა მიღებული „ინტეგრირებული ნიუსრუმის" პროექტის შექმნაში და, რომ, კარგი იქნებოდა თუ თვითონ გვიმრაძე გაუწევდა კოორდინირებას ამ პროექტის შესრულებას, რაღაც დროის მერე ის წავიდოდა ამ თანამდებობიდან და მის ადგილას მოვიდოდა პროფესიონალი „ტელევიზიონშიკი" ამიტომ დავთანხმდი ბარათაშვილის თხოვნას (ჩემი და ბარათაშვილის საუბარს ესწრებოდა ჩვენი ჟურნალისტი ნოდარ ჩაჩუა და არ მომცემს ტყულის თქმის უფლებას). მართლაც მივედი  რამდენიმე სააგენტოში, რომელსაც მასალა გამზადებული ჰქონდა დასაბეჭდად და  პირადად მე გავაჩერე და მოვახსნევინე დასაბეჭდად ჩაშვებული სტატიები. აგერ არის, ბატონო, „ერთი ნიუსის" ხელმძღვანელი ირაკლი მანაგაძე და და სააგენტო „რეპორტიორის" მთავარი რედაქტორი გიორგი მამაცაშვილი და დაადასტურებენ, რომ ღამის სამ საათზე შევხვდი ორივეს და ვთხოვე, რომ არ დაებეჭდათ მასალა. ასეთი გახლდათ ეს ისტორია და ვაღიარებ, რომ მართლაც მე შევაჩერე მაშინ ის კამპანია ქართულ მედიაში.

 - იქნებ დადგა დრო, რომ ხელისუფლება ჩაერთოს საზოგადოებრივი მაუწყებლის ირგვლივ მიმდინარე პროცესში? რამდენადაც ვიცი, უმრავლესობაში დგას საკითხი - რა ვუშველოთ საზოგადოებრივ მაუწყებელს...

- რა თქმა უნდა, მთავრობაც უნდა ჩაერიოს და ხალხიც. იმიტომ, რომ ეს ჩემი და თქვენი ჯიბიდან დაფინანსებული ტელევიზიაა. ჩვენ, ყველანი, ერთდ უნდა ჩავერიოთ და ვთქვათ, რომ ჩვენ გვინდა ტელევიზია, რომელიც უპასუხებს საზოგადოების მოთხოვნებს. თუ ბოლოს და ბოლოს ჩვენი მთავრობა და პარლამენტი ჩაერთვება ამ საკითხებში, იქნება ძალიან კარგი, ამას მხოლოდ მივესალმები. ხელისუფლებამ უნდა აიღოს პასუხისმგებლობა რაღაც პროცესებზე  თორემ, მიშვებულია ყველაფერი და კაცი ვერ გაიგებს, ვინ რას აკეთებს ამ ტელევიზიაში.

 

- გოგელიას გადაწყვეტილება, რომ მაუწყებლის დირექტორის თანამდებობის დასაკავებლად ნარკოლოგიური შემოწმების ცნობა საჭირო აღარ არის, უნდა გახდეს კონკრეტული უწყების დაინტერესების საგანი? ფორ.გე -სთან საუბრისას რამაზ საყვარელიძემ გამოთქვა ეჭვი, რომ  ამ შემთხვევაში ეს კრიტერიუმი იმიტომ ამოიღეს, რომ ეტყობა, იმის შემოწმება არ ღირს, ვინც უნდათ ამ თანამდებობაზე...

- მეც ზუსტად იგივე ეჭვი გამიჩნდა, რომ დღევანდელი ბორდი ისეთ ვიღაცას ლობირებს, რომელსაც არ უნდა, რომ ნარკოტექსტი გაიაროს. ისიც მეეჭვება, რომ  არჩევნები შეიძლება ჩაიშალოს.

- რა შემთხვევაში შეიძლება ჩაიშალოს?

- იმ შემთხვევაში, თუ ბორდს თავისი სასურველი კანდიდატი არ ეყოლება.

- მაგრამ ამ გადაწყვეტილებით ჩანს, რომ მათ უკვე იციან, ვინ უნდა აირჩიონ...

- გეთანხმებით და ამაშია მთელი უბედურება, რომ ბორდმა უკვე იცის, ვინ უნდა აირჩიოს. ამიტომ, ზუსტად ის მომენტები ამოიღეს, რისიც მათ ეშიანიათ. მართალია ამ წუთში ჩვენ ამას ვერ დავასაბუთებთ, მაგრამ ჩვენ შეგვიძლია ამაზე გვქონდეს შესაბამისი რეაქცია, ასე რომ არ მოხდეს. მოდით ვთქვათ, რომ ყველა ქვეყანაში საზოგადოებრივი მაუწყებელი ეს არის საჯარო სამსახური და საჯარო სამსახურში არავითარ შემთხვევაში არ შეიძლება, რომ ადამიანმა ნარკოლოგიური ტექსტი არ გაიაროს. წარმოგიდგენიათ, რომ საფრანგეთის საზოგადოებრივ მაუწყებელზე დანიშნონ დირექტორი, რომელსაც არ ჰქონდეს ნარკოლოგიური შემოწმება გავლილი?! წარმოგიდგენიათ, რა სკანდალი იქნება?! აქაც იგივე მდგომარეობაა.

- ამ შემთხვევაში გამოსავალს რაში ხედავთ? „საზოგადოებრივი მაუწყებლის" სამეურვეო საბჭოს გადაწყვეტილებით, საზოგადოებრივი მაუწყებლის გენერალური დირექტორის თანამდებობაზე ღია კონკურსი გამოცხადდა. კონკურსანტებს არ მოუწევთ სხვა საბუთებთან ერთად წარმოადგინონ სამედიცინო-ნარკოლოგიური შემოწმების ცნობა...

- იცით, წავიკითხე გოგელიას განცხადება და ბევრი სასაცილო მომენტები დავიჭირე მის განცხადებაში. თურმე, არ იცის, რა და როგორ იყო. თქვენ სასაცილოდ არ მოგეჩვენათ მისი განცხადება? სამეურვეო საბჭოს თავმჯდომარემ არ იცის, რომ ნარკოლოგიური შემოწმების ცნობა არის საჭირო. მაშინ, თუ არ იცი, წადი სახლში. ე.ი. მენეჯმეტში არ ვარგიხარ. ევროპაში, სადაც მე ვმუშაობდი საზოგადოებრივ მაუწყებელში, და არა მარტო იქ, საინფორმაციო ბადე იქმნება საჭირბოროტო საკითხებზე, პოლიტიკაზე ყველაზე ნაკლებად იგება საინფორმაციო ბადე.

ჩვენთან როგორ არის? - იმან ეს თქვა, ამან ასე უპასუხა, აი ამ დონეზეა დასული და არა პრობლემატიკაზე. რეგიონები, პრაქტიკულად, მიტოვებულია, მხოლოდ თბილისში მიმდინარე მოვლენებია გაშუქებული. საზოგადოებრივი მაუწყებელი ისეთ შემოქმედებით გადაცემებს უნდა აკეთებდეს, რომელსაც ვერ მოთხოვ კერძო ტელევიზიებს. იმათ როგორც უნდათ ისე შეუძლიათ გააკეთონ.

ჩვენი უბედურებაც ის არის, რომ საზოგადოებრივი მაუწყებლის საინფორმაციო გამოშვება რატომღაც იგება კერძო ტელევიზიების სტანდარტზე. ასე არ შეიძლება, ეს საზოგადოებრივი მაუწყებელია. საზოგადოებრივ მაუწყებელზე გვაქვს რომელიმე გადაცემა, რომელიც ქართულ კულტურაზე, ფოლკლორზე არის დაფუძნებული? არა! მინდა გითხრათ, რომ გერმანიის პირველ არხზე შაბათობით ორსაათნახევრიანი გადაცემა არის გერმანულ ფოლკლორზე, ეთნოგრაფიაზე და ა.შ. მსგავსი რამ გვაქვს? არა! ამაშია მთელი უბედურება. გვაქვს უბრალოდ სატელევიზიო ხმაური. ერთადერთი რასაც უყურებ, ეს არის ნინო ზაუტაშვილის თოქ შოუ.

სასწრაფოდ უნდა მოხდეს ახალი მენეჯმენტის და დირექტორატის არჩევა, ვიდრე წარმოგვიდგენია. უნდა მოვიდეს პროფესიონალი ადამიანი, რომელიც დანიშნავს ახალ მეჯმენტს და პროფესიონალს საინფორმაციო გამოშვებებში. ახლა დაიწყეს ტელევიზიაში პირველ სართულზე რემონტი, წლის ბოლოს. ისეთი შთაბეჭდილება შემექნმა, რომ რაღაცა ფულს ათეთრებენ. წლის ბოლოს რემონტი გაგიგიათ, ხალხო, როცა ბიუჯეტი ფაქტიურად გახარჯული უნდა იყოს? რაღაცაში „პრავდება" ფული, ასეთი ეჭვი გამიჩნდა.