„უფლებადამცველთა გაერთიანების" თავმჯდომარე ნიკოლოზ მჟავანაძემ ციხისძირში სამი ხის გადარგვასა და „ნაციონალების" მიერ იქ მოწყობილ აქციებზე „რეპორტიორის" პრესკლუბში განცხადება გააკეთა. მისი შეაფასებით, ცინიკურია ის განცხადებები, რაც ისმის ციხისძირიდან.

„დამნაშავე გუნდი, რომელმაც  გაანადგურა საქართველოს ეკოსისტემა, დღეს საუბრობს ეკოლოგიაზე.  აღა-მაჰმად-ხანს არ გაუკეთებია  იმდენი, რაც სააკაშვილმა გაუკეთა საქართველოს. შემოგთავაზებთ მცირე ჩამონათვალს იმ დანაშაულებისა, რომელიც მოუწყო საკუთარ ხალხს ნაციონალების რეჟიმმა", - განაცხადა მჟავანაძემ.

მისი თქმით, 2009-2011 წლებში ქალაქის ინფრასტრუქტურის განვითარებისა  და გზების გაყვანის მიზნით განადგურდა შემდეგი რეკრეაციული და გამწვანებული ტერიტორიები:

1. დიღმის ტყე-პარკი, სანაპიროს ქუჩაზე  და  დედაენის პარკთან მდებარე „დინამოს" კორტები, ვაკის პარკის დიდი ნაწილი, „მზიური", კიკვიძის პარკი,  ვარდების ბაღი, ბუკიას ბაღი, აღმაშენებლის გამზირი,  ყოფილი იპოდრომის ტერიტორია და თამარაშვილის ქუჩაზე არსებული ხეივანი, აეროპორტის ტრასაზე ლუგარის ცენტრთან მწვანე საფარი,  ოქროყანის და წყნეთის გამწვანებული ტერიტორიები, რუსთავის ტყე-პარკი, ზუგდიდის ბოტანიკური ბაღის  ნაწილი, თბილისის ზღვის მიმდებარე ტერიტორია, აღმაშენებლის ხეივანში გამწვანებელი ტერიტორია, 2011 წელს  ბათუმის ბულვარი და ა.შ.

2. ტენდეციად იქცა თბილისში სკვერებში პოლიციის და გამგეობის შენობების აღმართვა მწვანე საფარის განადგურების ხარჯზე. ასე მოხდა მოსკოვის გამზირზე, ბელიაშვილის ქუჩაზე, დადიანის ქუჩაზე, თამარაშვილის ქუჩაზე და ა. შ.

3. 2009 წელს თბილისის საკრებულოს გადაწყვეტილებით, თბილისის ტერიტორიაზე 40-მდე გამწვანებულ ტერიტორიას რეკრეაციული ზონის სტატუსი მოეხსნა. 2009 წლის 27 მარტს, საკრებულოს დადგენილებითვე,  თბილისის ტერიტორიის გამოყენებისა და განაშენიანების რეგულირების წესების თანახმად, რეკრეაციული ზონა 2-ის კატეგორიის ზონაში შესაძლებელი გახდა ინდივიდუალური საცხოვრებელი სახლების, სასტუმროების, რესტორნების და სხვა მსგავსი ტიპის შენობა-ნაგებობების მშენებლობა. აღნიშნულის შედეგად გაიჩეხა და განადგურდა რეკრეაციული ზონები.

4. 2011 წელს გარემოს დაცვის სამინისტროს რეორგანიზაციის შემდეგ   საქართველოს ტყეების უდიდესი ნაწილი - 1 961 098 ჰა გადავიდა საქართველოს ენერგეტიკის და ბუნებრივი რესურსების სამინისტროს სსიპ ბუნებრივი რესურსების სააგენტოს მართვაში, რის შემდეგაც   2011-2012  წლის მანძილზე ტყის მასივები განადგურდა რეგიონების მიხედვით შემდეგ მასშტაბებში.  1. თბილისი - 20 000, 2. აჭარის ა.რ. - 29 000, სამეგრელო ზემო სვანეთის მხარე 39 585, გურიის მხარე 10 989, იმერეთის მხარე 9 000, რაჭა-ლეჩხუმისა და ქვემო სვანეთის მხარე 14 000, შიდა ქართლის მხარე -7 000, მცხეთა-მთიანეთის მხარე -30 000, კახეთის მხარე - 20 000, ქვემო ქართლის მხარე - 8 000, სამცხე-ჯავახეთის მხარე - 37 000.    საბოლოო ჯამში, ერთი წლის მანძილზე უკანონოდ მოიჭრა 224  574 კუბური მეტრი ხეტყე.

5. სააკაშვილის ხელისუფლებამ მიიღო ცვლილებები კანონმდებლობაში, რომლის თანახმადაც,  თუ მეწარმე მთავრობასთან შეთანხმდებოდა და გადაიხდიდა განსაზღვრულ თანხას, მის მიერ „გარემოს დაცვისა და ბუნებრივი რესურსებით სარგებლობის სფეროში ჩადენილი და განხორციელებული ყველა ქმედება კანონიერად ჩაითვლებოდა და მას არ დაეკისრებოდა  სამოქალაქო ან ადმინისტრაციული პასუხისმგებლობა". ეს იყო  ეკოციდის მოწყობის მცდელობა საკუთარი ხალხისთვის, აღნიშნულთან დაკავშირებით შეტანილ იქნა ჩემსა და მწვანეთა პარტიის მიერ  საკონსტიტუციო სარჩელი და ჩვენ ეს პროცესი მოვიგეთ და ქვეყანა უბედურებას გადავარჩინეთ.

6. სახელმწიფო აუდიტის დასკვნის თანახმად, 2009-2011 წლებში, თბილისის მერიის მიერ დედაქალაქში გაცემულია 20 690 ხეზე მოჭრის უფლება. ამასთან  ზოგიერთი ტყე ტყეების ფონდიდან ამოიღეს და თბილისს გადასცეს როგორც გამწვანების ზოლი, რაც ასევე განადგურდა.  2003 წლიდან საქართველოს ტყეებიდან 9500 ჰექტარი ტყე გაქრა, რაზეც ასევე გამოძიებაა ჩასატარებელი.

„ამის შემდეგ ეს ხალხი საუბრობს სამი ხის გადარგვაზე.  და სად მიაქვს ეს ხეები ივანიშვილს?   შეკვეთილში, სადაც დენდროლოგიურ პარკს აკეთებს  სახელმწიფოსთვის", - აღნიშნა მჟავანაძემ.