მსოფლიო ბანკის მხარდაჭერით მიმდინარე მიმდინარე ეკონომიკური რეფორმები განიხილეს პირველი ვიცე-პრემიერის, ფინანსთა მინისტრ დიმიტრი ქუმსიშვილისა და მსოფლიო ბანკის მისიის ხელმძღვანელის გაბრიელ გოდარდის შეხვედრაზე.

აღინიშნა მსოფლიო ბანკის მხარდაჭერის მნიშვნელობა საქართველოში კერძო სექტორის კონკურენტუნარიანობის განვითარებაზე. ითქვა, რომ ბანკი საქართველოში სამწლიანი თანამშრომლობის პროგრამის ფარგლებში რამდენიმე მნიშვნელოვანი რეფორმის მხარდაჭერის ახორციელებს, რომლებიც მთავრობის 4-პუნქტიანი რეფორმების გეგმის ნაწილია. მსოფლიო ბანკის მიერ მხარდაჭერილ რეფორმებს შორისაა, საქართველოში კაპიტალის ბაზრის განვითარება, საპენსიო სისტემის რეფორმის შემუშავება, დეპოზიტების დაზღვევის რეფორმა, ინოვაციური ტექნოლოგიების მხარდაჭერა, ბიზნესის გარემოს გაუმჯობესებისკენ მიმართული ღონისძიებები და ღია მმართველობის რეფორმა. 

პირველმა ვიცე-პრემიერმა დიმიტრი ქუმსიშვილმა დადებითად შეაფასა მსოფლიო ბანკის მხარდაჭერა საქართველოში ეკონომიკის რეფორმირებისა და საქმიანი გარემოს გაუმჯობესების მიმართულებით. მან დეტალურად ისაუბრა მთავრობის 4-პუნქტიანი რეფორმების გეგმის შესახებ და იმ გადაწყვეტილებებსა და მსხვილ ინფრასტრუქტურულ პროექტებზე, რომლებიც მის ფარგლებში განხორციელდება.

თავის მხრივ, მსოფლიო ბანკის მისიის წარმომადგენლებმა დადებითად შეაფასეს ის გადაწყვეტილებები, რომლებიც საქართველოს მთავრობამ რეფორმების განხორციელების მიმართულებით მიიღო. 

შეხვედრაზე აღინიშნა, რომ მსოფლიო ბანკი საქართველოს სამთავრობო რეფორმების მხარდაჭერას მომავალშიც გააგრძელებს.