ძვირფასო ბათუმელებო, საქართველოს მოქალაქენო

მინდა მოგმართოთ თხოვნით, რათა ხელი მოაწეროთ პეტიციას რომლის ერთადერთ იდეას წარმოადგენს, ქალაქ ბათუმის მუნიციპალიტეტში,ერთ-ერთი ქუჩისთვის ღვაწლმოსილი ქართველი პოეტის, ტერენტი გრანელის (ტერენტი სამსონის ძე კვირკველია) სახელის მინიჭებას.

მეტად მნიშვნელოვანი და ღირებულია ჩვენთვის ტერენტი გრანელის პოეზია, ტურისტულ ზღვისპირა ქალაქს აქვს უდიდესი პოტენციალი, მოახდინოს ქართული კულტურის პროპაგანდა, ადგილობრივ თუ უცხოელ ვიზიტორებში.

ეს ნაბიჯი ხელს შეუწყობს მომავალ თაობაში ცნობიერების ამაღლებას ქართული ლიტერატურისა და პოეზიის მიმართ, რაც ასევე პრინციპულად მნიშვნელოვანია ქართული ეროვნული თვითშეგნების ჩამოყალიბებაში.

მაქვს თქვენი სოლიდარობის იმედი და მჯერა, ბათუმის მუნიციპალიტეტის საკრებულოს მხრიდან კეთილი ნების გამოხატულების..

ახლა უფრო ხშირია შეცდომების დაშვება, 
ახლა მოდის ივნისი, ირგვლივ მწვანე მოლია. 
ჩემი წმინდა სახელი პოეზიას დარჩება, 
ჩემი გული და სისხლი - ეს "Memento mori"-ა.

დღეს სამია ივნისის, მინდა იყოს ცამეტი, 
ჩემს გარშემო ციხეა - მწუხარების სავანე. 
რომ მდომოდა სიცოცხლე, სიკვდილს არ ვიწამებდი, 
მიწა არ იქნებოდა ჩემთვის შავი სამარე.

სადღაც მთასთან იწვიმა, სადღაც მთაზე ბურია, 
ამნაირი ღიმილი უწინ მე არ ვიცოდი. 
ახლა მე ცას ვუცქერი, ცაზე ანთებულია 
ვარსკვლავები - სიმბოლო თეთრი მარადისობის.

ახლა რა ვქნა არ ვიცი, მე როდესაც ასე ვარ, 
როცა სულს ეპარება აჩრდილები სიბერის.
მე ძლიერი ტალანტი, ზეციური არსება, 
ჩემი ნაზი სამშობლო - ლაჟვარდები ცისფერი.

რა ვქნა, შავი ღამეა, მძიმე და უსაშველო, 
მახსოვს ჩემი სოფელი, მისი ყრუ ადგილები. 
ახლა რაღაც სხვა მინდა, რაღაც სხვა, უსახელო, 
რომ დაღუპვა მომელის, ვიცი დანამდვილებით.

ნელა გადის დღეები და ძნელია გარჩევა, 
მე, ძვირფასო, ვერ მოვალ, გზა შენამდე შორია. 
ჩემი გვარი: გრანელი - პოეზიას დარჩება, 
ჩემი გული და სისხლი - ეს "MEMENTO MORI"-ა..

პატივისცემით, თეიმურაზ ხასია