მკვლელობის მომზადების მცდელობისთვის ბრალდებულ დეკანოზ გიორგი მამალაძეს სამართალდამცველები სასჯელაღსრულების დაწესებულებაში დღეს დაჰკითხავენ. ამის შესახებ მისმა ადვოკატმა განაცხადა.

ადვოკატი მიხეილ რამიშვილი დაკითხვის ზუსტ დროს ვერ აკონკრეტებს, თუმცა ამბობს, რომ გუშინ მას პროკურატურიდან დაუკავშირდნენ და აღნიშნულის შესახებ შეატყობინეს.

10 თებერვალს მკვლელობის მომზადების ფაქტზე დეკანოზი გიორგი მამალაძე დააკავეს. მთავარი პროკურორის ინფორმაციით, აღნიშნულ ფაქტზე გამოძიება დაიწყო 2017 წლის 2 თებერვალს ერთ-ერთი მოქალაქის განცხადების საფუძველზე, რომელმაც მიმართა საქართველოს პროკურატურას და მიუთითა, რომ მისმა ნაცნობმა მამა გიორგი მამალაძემ სთხოვა ციანიდის მოძიებაში დახმარება, რომლის გამოყენებითაც ამ უკანასკნელს უნდა მოეხდინა მაღალი იერარქიის სასულიერო პირის სიცოცხლის ხელყოფა.

მოგვიანებით, ბრალდებული დეკანოზის ადვოკატმა გაავრცელა ინფორმაცია, რომ გიორგი მამალაძისთვის წარდგენილ ბრალდებაში პატრიარქის მდივან-რეფერენტის შორენა თეთრუაშვილის სახელი ფიგურირებდა.

დეკანოზი გიორგი მამალაძე წარდგენილ ბრალდებაში თავს დამნაშავედ არ ცნობს.

წყარო :