საქართველოს ხელოვანთა კავშირი „ხელოვნება მომავლისთვის", კლასიკური მუსიკის და ხელოვნების საერთაშორისო კომიტეტი „მომავლის ვარსკვლავები" და იტალიის ქ. პეზაროს, რენატა ტებალდის და მარიო დელ მონაკოს სახელობის საერთაშორისო აკადემია, ამა წლის 12-18 მაისს, იტალიის ქ. პეზაროში ატარებს კლასიკური მუსიკის მე-6 საერთაშორისო კონკურსს „მომავლის ვარსკვლავები"/FUTURE STARS 2017, რომელიც ეძღვნება საკონკურსი პროექტის „მომავლის ვარსკვლავების" მე-10 საიუბილეო წლის და მაესტრო მარიო მელანის დაბადებიდან 100 წლის საიუბილეო თარიღს. საქართველოს და იტალიის მხარეებს შორის გაფორმდა კულტურული ურთიერთთანამშრომლობის ერთწლიანი მემორანდუმი, რომელსაც ხელი მოაწერეს საქართველოს ხელოვანთა კავშირის თავმჯდომარემ, მუსიკოსმა, ნინო კუპატაძემ და იტალიის ქ. პეზარის აკადემიის სამხატვრო ხელმძღვანელმა, ცნობილმა ქართველმა სოპრანომ ნინო ლეჟავამ.

კონკურსში მონაწილეობას მიიღებენ ქართველი, იტალიელი, გერმანელი, ირანელი, ყაზახი და აზერბაიჯანელი ნიჭიერი ვირტუოზი მუსიკოსები. საქართველოს და იტალიის მხრიდან საგანგებოდ მოწვეული საერთაშორისო ჟიურის მიერ ნომინირებული მონაწილეებისთვის გათვალისწინებულია შემდეგი პრიზები: ერთწლიანი უფასო სწავლა იტალიის ქ. პეზაროს რ. ტებალდის და მ. დელ მონაკოს სახ. საერთაშორისო აკადემიაში, მაესტრიო მარიო მელანის სახელობის პრიზი - 2 კაციანი უფასო მასტერ-კლასები და კონცერტი, როსინოს სახ. სინფონიური ორკესტრის სპეციალური პრიზი - კონცერტში მონაწილეობა სინფონიური ორკესტრის თანხლებით და 10 დღიანი უფასო მასტერ-კლასები ორკესტრის პირველ ვიოლინოსთან; ასევე მონაწილეობა სხვადასხვა საერთაშორისო კონკურსებში, მათ შორის სინფონიურ ორკესტრთან ერთად, ერთწლიანი სტიპენდიები, ფულადი პრემიები და ექსკლუზიური სახელობითი ჯილდოები. პროექტს უკვე აქვს ფართო გამოხმაურება იტალიურ პრესაში.

იტალიის მე-6 საერთაშორისო კონკურსში საქართველოს მხრიდან მონაწილეობის მიღების უფლება მიენიჭათ მხოლოდ საქართველოს ხელოვანთა კავშირის და „მომავლის ვარსკვლავების" რესპუბლიკური და საერთაშორისო პროექტების პრიზიორებს, განსაკუთრებით წარმატებულ მუსიკოსებს თბილისის, ბათუმის, ქუთაისის და სხვა ქალაქების სამუსიკო სასწავლებლებიდან, ვინც მნიშვნელოვან წარმატებას მიაღწია არამარტო რესპუბლიკურ, არამედ საერთაშორისო ასპარეზზე. კონკურსი ტარდება მასტერ-კლასების გათვალისწინებით, გალა-კონცერტს და დაჯილდოების ცერემონიას დაესწრებიან მსოფლიოს რანგის იმპრესარიოები, რომლებიც დააკვირდებიან ქართველ ვირტუოზ მუსიკოსებს და დაინტერესების შემთხვევაში, მათ მიეცემათ უპრეცენდენტოდ საუკეთესო საშუალება, საერთაშორისო ასპარეზზე დასამკვიდრებლად.