თურქეთის პრეზიდენტმა რეჯეპ ტაიპ ერდოღანმა გერმანიის ხელისუფლებას ბრალი დასდო თურქეთში ტერორიზმისთვის ხელის შეწყობაში. ხოლო თურქეთში დაკავებული ჟურნალისტი დენიზ იუჯელი „გერმანიის შპიონად" შერაცხა.

„მათ სასამართლოს წინაშე პასუხი უნდა აგონ ტერორისტების მხარდაჭერისთვის და თავშესაფრის მიცემისთვის", - განაცხადა ერდოღანმა და დაამატა, რომ დენიზ იუჯელი ერთი თვე გერმანიის საკონსულოში იმალებოდა.

ერდოღანმა აღნიშნა, რომ მაშინ, როდესაც მის მინისტრებს საშუალებას არ აძლევენ სიტყვით გამოვიდნენ გერმანიის ქალაქებში, აკრძალულ ქურთულ ორგანიზაციებს გერმანიაში საჯარო განცხადებებისთვის სივრცეს აძლევენ.

„მინისტრთა კაბინეტის ორ წევრს სურდა გერმანიაში მცხოვრები თურქეთის მოქალაქეებისთვის საკონსტიტუციო ცვლილებების არსი აეხსნათ. პასუხად უარი მივიღეთ იმის საფუძველზე, რომ შენობასთან პარკირებისთვის საკმარისი ადგილი არ არის", - აღნიშნა ერდოღანმა.