„ნურავინ იფიქრებს, რომ ეს დანაშაული ერთი პირის მიერ დაიგეგმა. ამ ადამიანებს და კონკრეტულად მამა გიორგის უკან დასახევი გზა არ ჰქონდა, ისინი ყველაფერზე იყვნენ წამსვლელები", - ამის შესახებ ე.წ. ციანიდის საქმის მთავარმა მოწმემ ირაკლი მამალაძემ გადაცემაში „იმედის დრო" განაცხადა. როგორც მამალაძემ აღნიშნა, დანაშაულის დამგეგმავი პირებისთვის ყველაზე მისაღები ვარიანტი იქნებოდა, რომ პატრიარქი მისი მდივან-რეფერანტის, შორენა თეთრუაშვილის ხელით მოშორებულიყო.

„დარწმუნებული არ ვარ იმაში, რომ უშუალოდ, მამა გიორგის ხელით მოიწამლებოდა ვინმე. შესაძლოა, ვინმესთვის გადაეცა ეს, ვინც ბერლინში ელოდებოდა.

დანაშაული პროვოკაციულად იგეგმებოდა, მათთვის ყველაზე მისაღები ვარიანტი იქნებოდა, რომ პატრიარქი შორენა თეთრუაშვილის ხელით მოშორებულიყო და მათ ამის შემდეგ ტახტისკენ გზა უსუფთავდებოდათ", - განაცხადა ირაკლი მამალაძემ.