საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი ვარაუდობს, რომ ადგილობრივი თვითმმართველობის არჩევნები „ქართული ოცნების" დამაჯერებელი გამარჯვებით დასრულდება. ამის შესახებ სუბარმა „პალიტრანიუსის" გადაცემაში „360 გრადუსი" განაცხადა.

„ეს არჩევნებიც ჩვენი დამაჯერებელი გამარჯვებით დასრულდება. რაც შეეხება პოლიტიკურ პარტიებს, დადგა დრო, როდესაც ისინი რაღაცნაირად უნდა გადაჯგუფდნენ და ახლებურად დაანახონ ხალხს თავისი სათქმელი", - განაცხადა სუბარმა.

სუბარმა ასევე IRI-ს ბოლო კვლევებზე ისაუბრა და აღნიშნა, რომ წინა კვლევა, რომელიც გამოქვეყნდა არჩევნებამდე რამდენიმე დღით ადრე, აჩვენებდა, რომ „ნაციონალურ მოძრაობას" „ქართულ ოცნებაზე" 1%-ით ნაკლები ჰქონდა, თუმცა შედეგი სულ სხვა დადგა.

„IRI-ს წინა კვლევაში ერთი პროცენტით ჩამოგვრჩებოდა „ნაციონალური მოძრაობა", 9 პროცენტი ჰქონდა „თავისუფალ დემოკრატებს" და „პატრიოტები" საერთოდ ბარიერს მიღმა იყვნენ, თუმცა საერთოდ სხვა შედეგი მივიღეთ. კვლევებზე, რომელიც არც ერთხელ გამართლებულა, ვწევთ თემებს, თითქოს ეს არის სამყაროს დასასრული. ჩვენი შიდა კვლევების მიხედვით კი ვამბობდით, რომ 100-ზე მეტ მანდატს მივიღებდით და ავიღეთ 113. ნიძლავიც მაქვს დადებული, რომ „ნაციონალური მოძრაობა" ვერასდროს მოაგროვებდა 30%-ს. ეს ნიძლავი დავდე „ნაციონალური მოძრაობის" ყოფილი წევრთან, რომელსაც ახლა ბიზნესშია და პოლიტიკასთან შეხება არ აქვს", - განაცხადა სუბარმა.