რუსეთის უსაფრთხოების ფედერალური სამსახურის (ФСБ) დირექტორის ალექსანდრ ბორტნიკოვის განცხადებით, რუსეთის უსაფრთხოების ფედერალურმა სამსახურმა (ФСБ) სანკტ-პეტერბურგის მეტროში 3 აპრილს განხორციელებული ტერაქტის დამკვეთის ვინაობა დაადგინა.

ბორტნიკოვს აღნიშნულთან დაკავშირებით დეტალები არ გაუსაჯაროებია, თუმცა აღნიშნა, რომ ტერაქტის გამოძიება გრძელდება.

6 აპრილს რუსეთის საგამოძიებო კომიტეტმა რვა ეჭვმიტანილის დაკავების თაობაზე გაავრცელა ინფორმაცია, ექვსი მათგანი მოსკოვში, ხოლო ორი სანკტ-პეტერბურგში დააკავეს.

17 აპრილს კიდევ ერთი ეჭვმიტანილი, აბრორ აზიმოვი დააკავეს, რომელიც რუსეთის უსაფრთხოების ფედერალური სამსახურის (ФСБ) ინფორმაციით, თვითმკვლელი-ტერორისტის მომზადებით იყო დაკავებული.

3 აპრილს სანკტ-პეტერბურგის მეტროში მომხდარი ტერაქტის შედეგად 15 ადამიანი დაიღუპა. ტერაქტი თვითმკვლელმა ტერორისტმა განახორციელა.