საპარლამენტო უმრავლესობის წევრმა დავით ჭიჭინაძემ „რეპორტიორთან" მიმდინარე პოლიტიკური თემები მიმოიხილა, განსაკუთრებული აქცენტი კი საკონსტიტუციო კომისიის მუშაობაზე გააკეთა.

- საკონსტიტუციო კომისიამ მუშაობა დაასრულა, მის მუშაობას როგორ შეაფსებთ?

- კომისიის მუშაობას დადებითად შევაფასებ. საყოველთაო, სახალხო განხილვები ჯერ კიდევ წინ არის. კომისიამ შეიმუშავა ის, რაც მოეთხოვებოდა, მეტ-ნაკლებად გათვალისწინებული იყო ყველას აზრი, შეუძლებელია, კომისიაში ყველა ერთ აზრზე იყოს, შესაბამისად, ასეთი საკითხები ხმათა უმრავლესობით წყდება. პროექტი ფართო საზოგადოებას წარედგინება, განხილვის შედეგად კი მიღებული იქნება სხვადასხვა კორექტივი.

საბოლოო ჯამში, მივიღებთ კონსტიტუციას, რომელიც ჩვენი ქვეყნისთვის საკმაოდ მნიშვნელოვანია.

- უქმდება მაჟორიტარული სისტემა, რამდენად იზიარებთ ამ გადაწყვეტილებას?

- მთავარია პატიოსანი არჩევნები, რომელიც ხალხის ნებას გამოხატავს. რაც შეეხება კონკრეტულად მაჟორიტარულ და პროპორციულ სისტემას, როდესაც ორივე სისტემა ერთობლივადაა, უფრო არასამართლიანია. შეიძლება იყოს ან სრულიად პროპორციული, ან სრულიად მაჟორიტარული სისტემა. ვფიქრობ, რომ ყველა დეპუტატი თანაბარი პრინციპით უნდა ირჩეოდეს.

- ვენეციის კომისიისგან კონკრეტულად რა მიმართულებით ელოდებით შენიშვნებს?

- ვინც ვენეციის ჯგუფთან მუშაობს, საკმაოდ სოლიდური ჯგუფია, ამიტომ ეს მათი კომპეტენცია უფროა და სწორედ მათ აქვთ უფრო მეტი შესაძლებლობა იმისა, რომ კონკრეტული ნაბიჯის სისწორეში დაარწმუნონ.  ასეთ დეტალებში და სიღრმეში ნამდვილად ვერ შევალ, ვენეციის კომისიასთანაც არანაირი კავშირი არ მაქვს.

- იცვლება პრეზიდენტის არჩევის წესიც, რამდენად სამართლიანად მიგაჩნიათ, რომ პრეზიდენტს საარჩევნო კოლეგია აირჩევს?

- ლაპარაკი იყო, თითქოს არსებობდა მარგველაშვილის შიში, ამიტომ 2018 წელს პირდაპირი წესით იქნება პრეზიდენტი არჩეული. ვიცი, რომ მარგველაშვილი ძალიან მაღალი რეიტინგის ადამიანია, მაგრამ სინამდვილეში არჩევნები გამოაჩენს მის რეიტინგსაც და შესაძლებლობებსაც.

საერთოდ, პრეზიდენტის პირდაპირ არჩევა გაცილებით მეტი ლეგიტიმაციაა, ვიდრე პარლამენტის მიერ არჩევა. მაგრამ, ის უფლებამოსილებები, რაც დღეს მოქმედი კონსტიტუციით, საყოველთაოდ არჩეულ პრეზიდენტს აქვს, გაცილებით ნაკლებია, ვიდრე დეპუტატისა, ამიტომ, ჯობია, რომ ყველაფერს თავისი სახელი დაერქვას, დაიზოგოს დროც, ენერგიაც და ხარჯიც.

- დიდგორის დღის უქმედ გამოცხადებასთან დაკავშირებით მაინტერესებს თქვენი შეხედულება, რას ფიქრობთ, უნდა გაითვალისწინოს თუ არა ქართულმა მხარემ თურქეთის საელჩოს თხოვნა?

- ზოგადად, თავის დროზე, როდესაც კანონპროექტი პარლამენტში წარმოადგინეს, საკითხთან მიმართებით ბევრი კითხვა გაჩნდა, რადგან დეპუტატების ნაწილმა კანონში მოუმზადებელი რაღაც დაინახა.

არ აქვს მნიშვნელობა, თურქეთი იქნება, შეერთებული შტატები, ევროკავშირის რომელიმე ქვეყანა თუ ჩვენი მტერი ქვეყანა, ნებისმიერი უნდა იყოს თავშეკავებული იმასთან მიმართებით, რითაც ჩვენ ვამაყობთ. ვთვლი, რომ მეზობლები ერთმანეთის შიდა საქმეებში ნაკლებად უნდა ჩავერიოთ. 

- თურქეთზე ვსაუბრობთ და ბარემ აქვე განვიხილოთ ჩვენს მეზობელ ქვეყანაში ჩატარებულ რეფერენდუმი, როგორ შეაფასებთ და იქონიებს თუ არა ჩვენზე რაიმე გავლენას?

- როგორც თურქებს არ აქვთ უფლება, ჩვენს საქმეებში ჩაერიონ, ასევე, ჩვენ პატივი უნდა ვცეთ თურქი ხალხის არჩევანს და მივესალმოთ მიღებულ გადაწყვეტილებას. 

თუ რამდენად მართებული გადაწყვეტილება მიიღეს თურქეთში, ამას მომავალში თვითონ მოსახლეობა განსაზღვრავს. საერთოდ, ქართველებმა ამაზე ნაკლებად უნდა ვიფიქროთ.

- რუსეთის საგარეო საქმეთა მინისტრი სერგეი ლავროვი გასულ კვირას სოხუმში იმყოფებოდა, ვიზიტის ოფიციალურ მიზეზად კი საელჩოს გახსნა დასახელდა. როგორ ფიქრობთ, ჰქონდა თუ არა რაიმე სხვა მიზანი ამ ვიზიტს?

- ასეთ ვიზიტებს, რა თქმა უნდა, ხელისუფლება რუსეთის მხრიდან აგრესიულ ნაბიჯად აფასებს. ყველაზე დიდი დანაშაული აქ ისაა, რომ საელჩოს გახსნაზეა ლაპარაკი, ამის მეტი რა უნდა არსებობდეს? კულუარებში სხვადასხვა საკითხზე საუბარი გაცილებით მეტი ზიანის მომტანია ჩვენი ქვეყნისთვის, ვიდრე ოფიციალური საელჩოს გახსნა.

საერთოდ, ყველაზე დიდი უსამართლობა ჩვენი ქვეყნისთვის ისაა, რომ ჩვენივე ტერიტორიაზე სხვა ქვეყანამ, ჩვენგან დამოუკიდებლად, საელჩო გახსნა. ეს გახლავთ კიდევ ერთი ოკუპანტური ნაბიჯი. რა თქმა უნდა, რუსეთი საკუთარ ნაბიჯებს სხვანაირად შეაფასებ, თუმცა, ჩვენი შეფასებით ეს საკმაოდ მტრული ნაბიჯია მათი მხრიდან. 

- „ნაციონალური მოძრაობა" შერიგებისა და თანასწორობის საკითხებში სახელმწიფო მინისტრის აპარატის გაუქმებას მიზანშეწონილად მიიჩნევს, მათი თქმით, ის უნდა შეურთდეს საგარეო საქმეთა სამინისტროს, რამდენად ეთანხმებით ამ შეხედულებას?

- სიმართლე გითხრათ, „ნაციონალური მოძრაობის" განცხადებებზე არც ვფიქრობ და არც  ვეთანხმები. თუ მეხსიერება არ მღალატობს, ეს სამინისტრო მათივე შექმნილია, მოგეხსენებათ, მათი მმართველობის პერიოდში ძალიან ბევრი სამინისტრო კონკრეტული ადამიანებისთვის იყო შექმნილი. ალბათ გახსოვთ, გია ბარამიძის ჩაჩოჩების შედეგად სამინისტრო რომ შეიქმნა. საერთოდ, არ ვთვლი, რომ დღეს ეს სამინისტრო არ მუშაობს, მაგრამ იმ მომენტში, როცა შეიქმნა, ნამდვილად არ მუშაობდა, ეს კონკრეტულად ადამიანის დასაქმების მიზნით გახლდათ შექმნილი.

დღეს, როდესაც რაღაც ეფექტურად მუშაობს, თუ დააკვირდებით, „ნაცმოძრაობა" მაშინვე ამის წინააღმდეგ გამოდის. საერთოდ, ქვეყნისადმი ასეთი მტრული დამოკიდებულება არცერთ პოლიტიკურ პარტიას არ უნდა ახასიათებდეს.

- თქვენ ხართ დარგობრივი ეკონომიკისა და ეკონომიკური პოლიტიკის კომიტეტის წევრი, თუ შეგიძლიათ გვითხრათ, რა სიახლეებს უნდა ველოდეთ კომიტეტისგან?

- ჩვენ ძირითადად ვახდენთ იმ ხელშეკრულებების რატიფიცირებას, დამუშავებასა და მიერთებას, რომელზეც საქართველოს ვალდებულება გააჩნია თავისუფალ ვაჭრობასთან მიმართებით. შესაბამისად დაგეგმილია ინფრასტრუქტურისა და ეკონომიკის მინისტრების მოსმენა, რაც საკმაოდ საინტერესო იქნება მედიისთვის. ბევრი დადებითი ინფორმაცია იქნება გაჟღერებული. გავრცელდება ანგარიში იმ გაწეული სამუშაოების შესახებ, რომელსაც „აწარმოე საქართველოში" ჰქვია და რომელიც საკმაოდ საინტერესო პროგრამაა. სკეპტიკურად უყურებდნენ ამას, მაგრამ გავიდა 2 წელი, დაიწყო მესამე და შედეგი სახეზეა, შესაბამისად ეს პროგრამა უნდა გაგრძელდეს, უფრო მეტად გაფართოვდეს და მეტი სფერო მოიცვას, რადგანაც ჩვენი ქვეყნის ეკონომიკის განვითარებაზეც მოქმედებს.

- მოსახლეობა ე.წ. ელიავას ბაზრობის ტერიტორიაზე რეკრეაციული ზონის გაშენებას ითხოვს... ეთანხმებით თუ არა ამ მოთხოვნას?

- ელიავას ბაზრობის გარშემო მაინცდამაინც დიდი რაოდენობის მოსახლეობა არ ცხოვრობს, სულ 2-3 კორპუსია და დანარჩენი სამრეწველო ზონა გახლავთ. რამდენად რეალურია, 2-3 კორპუსისთვის ეს ტერიტორიები გადაკეთდეს რეკრეაციულ ზონად? მაშინ საბურთალოს და ვაკის მოსახლეობამ რა დააშავა, სადაც, პრინციპში, განადგურებულია ყველაფერი. თავისუფალი კუთხე და ის ტერიტორიები, სადაც ჰაერის ნაკადი მოძრაობდა, „ნაციონალურმა მოძრაობამ" გაყიდა.

საერთოდ, რეკრეაციული ზონები ქალაქგარეთ უნდა იქნეს გაკეთებული. არ არის სწორი, ვიღაცას რაღაც წავართვათ და იქ ხე დავრგათ, ხეები კარგია და მივესალმები, მაგრამ ელიავას ბაზრობაზე უამრავი ადამიანია დასაქმებული, სარჩოს შოულობენ.

თანამედროვე სახის მიცემის მოთხოვნა რომ ყოფილიყო, სულ სხვა რაღაც არის. არ უნდა დადიოდე 21-ე საუკუნეში ტალახში, ცივილიზებული ფორმა უნდა იყოს ყველგან, შესაბამისად, ეს მიდგომა უფრო სწორი იქნებოდა.

რადგანაც ადამიანები იქ დადიან და ეს ბაზრობა ამდენი ხანია არსებობს, ე.ი. მის მიმართ მოთხოვნილება არის.