საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ სამხედროებს საქართველოს რაგბის კავშირის ახალი პრეზიდენტი გოჩა სვანიძე წარუდგინა, სადაც კაპანაძემ განაცხადა, რომ თუკი ვინმეს შეუძლია თქვას, რაგბი ჩვენი თამაშია - უპირველეს ყოვლისა, ესენი ქართველი სამხედროები არიან.

თავდაცვის სამინისტროს ინფორმაციით, გაცნობითი შეხვედრა თავდაცვის სამინისტროს კულტურულ-საგანმანათლებლო ცენტრში გაიმართა.

გენერალ-მაიორმა შეიარაღებულ ძალებში სპორტის სხვადასხვა სახეობების და განსაკუთრებით რაგბის განვითარებასა და მის მნიშვნელობაზე ისაუბრა.

მისი თქმით, ქართულ ჯარში რაგბის, ლელოს, ხრიდოლის და მსგავსი სპორტის პოპულარიზაცია ისტორიული ფესვების განვითარებას და წინ წამოწევას უწყობს ხელს, რადგან რაგბი ფიზიკურ განვითარებასთან ერთად, სხარტ აზროვნებას და გამტან სულსაც გულისხმობს.

გენერალ-მაიორმა კაპანაძემ ის გმირი მორაგბეებიც გაიხსენა, რომლებიც საქართველოს ტერიტორიულ მთლიანობას შეეწირნენ.

საქართველოს რაგბის კავშირის პრეზიდენტმა გოჩა სვანიძემ საქართველოს შეიარაღებულ ძალებს მადლობა გადაუხადა იმ ღვაწლისთვის, რასაც ჯარი ქართული რაგბის განვითარებისთვის აკეთებს და აღნიშნა, რომ რაგბის კავშირი აბსოლუტურად გახსნილია ნებისმიერი ინიციატივისთვის, რაც სხვა ღონისძიებებთან ერთად, რეგიონულ თუ მსოფლიო დონის შეჯიბრებებსაც გულისხმობს.

გენერალ-მაიორმა და რაგბის კავშირის პრეზიდენტმა ქართველ სამხედროებს სამომავლო გეგმები და თანამშრომლობის ფორმატიც გააცნეს.

შეხვედრაზე საქართველოს შეიარაღებული ძალების მიერ ბრიტანეთში თავდაცვის თასისთვის ჩატარებული თამაშებიც გაიხსენეს.

გენერალური შტაბის უფროსმა სამხედროებს და სტუმრებს ინიციატივაც გააცნო, რომელიც სხვადასხვა ქვეყნების სამხედრო გუნდების მონაწილეობით საერთაშორისო ტურნირის ჩატარებას გულისხმობს.

„ამ კუთხით ჩვენი აქტიურობა ძალიან მნიშვნელოვანია, რადგან მსგავსი შეხვედრები ხელს უწყობს სამხედროების დამეგობრებას, რათა კიდევ ერთხელ გავუსვათ ხაზი ჩვენს მისწრაფას ნატო-სკენ", - განაცხადა ვახტანგ კაპანაძემ.