„ფოტოზე რომ ლამაზ მოხუცს ხედავთ, ჩემი მეგობრის, ეკა მელქაძის მამაა", - წერს ჟურნალისტი დარეჯან მეფარიშვილი სოციალურ ქსელში.

„ახლა ვნახე ეკას პოსტი და გარდა იმისა, რომ ძალიან მინდა მიულოცოთ ამ კაცს დაბადების დღე, ასევე ძალიან მინდა წაიკითხოთ ის, რასაც ეკა წერს და ვინც არ იცნობთ, გაიცნოთ ეს ქართველი კაცი! კაცი - ლეგენდა!!" - წერს დარეჯან მეფარიშვილი.

ეკა მელქაძე სოციალურ ქსელში წერს:

„დღეს მამა 80 წლის გახდა! ძალიან დამიბერდა ჩემი „კრასავჩიკი", მაგრამ არ იმჩნევს. დილიდან ურეკავენ „გოგოები", „ბიჭებიც", რა თქმა უნდა, უხარია პატარა ბავშვივით...

უამრავი მოგონება, რამდენჯერმე შემოვლილი მსოფლიო (თანაც მაშინ, როდესაც ჩეხოსლოვაკიაში მოხვედრა ოცნების პიკი იყო), 5 მხატვრული და 300-მდე დოკუმენტური ფილმი, კაცმა არ იცის რამდენი გადაცემა და კონცერტი, ბეევრი ჯილდო, მედალი, ორდენი, წოდება... პირველი ადამიანი, რომელმაც გადაიღო რუსთაველის ფრესკა იერუსალიმში და რუსთაველის პრემია მხოლოდ მას არ მისცეს - პარტიული არ ხარო, ლოს-ანჯელესის ოქროს ფონდში დაცული ერთადერთი ქართული ფილმის, „მწირის" დამდგმელი ოპერატორი, რომელიც სამსახურიდან გამოუშვა ტელევიზიის „დიდმა რეფორმატორმა"... ბევრი სიხარული, ტკივილი, დიდი წარმატებები და გაზრდილი თაობები, ქართულ კინოსა და ტელევიზიაში გატარებული თითქმის 60 წელი დაიტია გივი მელქაძის ცხოვრებამ... გილოცავ, მამა!!!" - წერს მელქაძე.