„კახა კალაძე ძალიან კარგი მერი იქნება", - ამის შესახებ „ნაციონალების" რეჟიმის მიერ მოკლული ბუტა რობაქიძის დედამ ია მეტრეველმა „რეპორტიორთან" საუბარში განაცხადა.

„დარწმუნებული ვარ, რომ კახი კალაძე ძალიან კარგი მერი იქნება, ძალიან ბევრ კარგ საქმეს გააკეთებს, მას ამისთვის ყველანაირი პოტენციალი აქვს. ის ამას შეძლებს მისი ფიზიკური მონაცემებიდან გამომდინარე, მისი ახალგაზრდობით, მისი ნიჭიერებით. ნამდვილად წარმატებული ახალგაზრდაა, რომელსაც თავისი შრომით აქვს ყველაფერი მიღწეული. მან ზუსტად იცის შრომის ფასი. ვფიქრობ, რომ კახი კალაძე ნამდვილად გამოადგება ქალაქს", - განაცხადა ია მეტრეველმა.

ია მეტრეველმა აქვე დავით ნარმანიას მერობის პერიოდზე გაამახვილა ყურადღება:

„აქვე არ შემიძლია ხაზი არ გავუსვა ბატონი დავით ნარმანიას მერობის პერიოდს. ნამდვილად ბევრი საქმე გააკეთა მან და ძალიან კარგი მერი იყო. ეს იყო უწესიერესი ადამიანი, რომელსაც ვერანაირი ხინჯი ვერ მოუძებნეს „ნაციონალებმა" და „რუსთავი 2"-მაც კი ვერ უპოვა მას ვერანაირი კორუფციული ვერაფერი. დავით ნარმანია გამოირჩეოდა განსაკუთრებული ადამიანობით, მოთმინებითა და წესიერებით. მე მას მადლობა მინდა ვუთხრა და აქვე კახის ვუსურვო, რომ დავით ნარმანიას მიერ დაწყებული კარგი პროექტები ასევე წარმატებით დაასრულოს. ვფიქრობ, კახი ნამდვილად გაართმევს თავს. მოხარული ვარ, რომ ასეთი კარგი მერი ეყოლება თბილისს", - განაცხადა ია მეტრეველმა.