ხვალ წმინდა მარიამ ეგვიპტელის ხსენების დღეა მართლმადიდებელი ეკლესია ხვალ წმინდა მარიამ ეგვიპტელის ხსენების დღეს აღნიშნავს. დიდმარხვის მეხუთე კვირას, ხვალ, მართლმადიდებელი ეკლესია წმინდა ღირსი დედის, მარიამ ეგვიპტელის ხსენებას აღნიშნავს.

წმიდა მარიამ ეგვიპტელი V საუკუნეში მოღვაწეობდა. მის შესახებ ცნობები წმინდა მამა ზოსიმე პალესტინელმა შემოინახა. იგი წმ. მარიამ ეგვიპტელს იორდანის უდაბნოში შეხვდა, სადაც მისი თავგადასავალი შეიტყო.

მარიამი ახალგაზრდობაში უღირსი ცხოვრებით ცხოვრობდა. შემდეგ ღვთის განგებით მოექცა და ცოდვების მოსანანიებლად მთელი თავისი დარჩენილი ცხოვრება უდაბნოში გაატარა, სადაც აღესრულა კიდეც.

დიდმარხვის მეექვსე შვიდეულის შაბათს კი ლაზარეს შაბათი აღინიშნება. სახარების მიხედვით, უფალმა მისი მეგობარი ოთხი დღის მკვდარი ლაზარე მკვდრეთით აღადგინა. ამ დღეს მორწმუნეებს თევზის მიღება შეეძლებათ.

დიდმარხვის მე-6 კვირას, ბაიაობის, ანუ ბზობის დღესასწაული აღინიშნება. ამ დღეს მორწმუნეები ტაძრებში ბზის ტოტებით მიდიან და ბზის კურთხევა აღესრულება. ამ დღეს ეკლესია უფლის იერუსალიმში დიდებით შესვლას აღნიშნავს.

სახარების მიხედვით, იერუსალიმში დიდებით შემავალ უფალს ზეთისხილის რტოებსა და ტანსაცმელს უფენდნენ, შეძახილით: "ოსანა! კურთხეულ არს მომავალი, მეუფე ისრაელისაი!". ბზობის დღესასწაულს მარხვა ხსნილია თევზით.

დიდმარხვა წელს 14 მარტს დაიწყო და 1 მაისს უფლის აღდგომის ბრწყინვალე დღესასწაულზე დასრულდება.