საქართველოს რესპუბლიკურ პარტიის თავმჯდომარე ხათუნა სამნიძემ ჟურნალისტებს სასტუმრო „ჰოლიდეი ინნში",  სადაც შიდაპარტიული შეკრება გაიმართება, განუცხადა, რომ რესპუბლიკურ პარტიას არც ერთ სხვა პარტიასთან მოლაპარაკებები ან დისკუსია არ აქვს.

მისი თქმით, დღევანდელ შეხვედრაზე იმსჯელებენ შიდაპარტიულ პროცესებზე, გაიმართება დისკუსია წინასაარჩევნო მზადების საკითხებზე და თავად არჩევნებთან დაკავშირებით.

„პარტიის სიის შერჩევა საკმაოდ რთული და ხანგრძლივი პროცესია და ჯერ კონსულტაციები ამაზე პარტიაში არ დაწყებულა.
დღეს ვისაუბრებთ, თუ როგორ ხედავენ ჩვენი პარტიის წევრები რესპუბლიკური პარტიის პოზიციონირებას, ვისაუბრებთ მათ ხედვაზე, თუ როგორც ხედავენ თუნდაც იმ გზავნილებს, რომლითაც ჩვენ გვინდა ამომრჩეველს ვესაუბროთ", - განაცხადა ხათუნა სამნიძემ.

რესპუბლიკური პარტიის თავმჯდომარე ასევე გამოეხმაურა სენაკში პარტიის 25 წევრის გადაწყვეტილებას, რომლებმაც რესპუბლიკური პარტია დატოვეს.

„არც სენაკში და არც სხვაგან არანაირი სიტუაცია არ არის დაძაბული. იქ არის ჩვეულებრივი პროცესი. ორგანიზაციიდან წევრები მიდიან და ასევე ორგანიზაციაში შემოდიან სხვადასხვა ადამიანები. ეს არის ჩვეულებრივი პროცესი, როგორც სხვა ორგანიზაციებში ხდება, ორგანიზებულად რაიმე ერთი კონკრეტული მიზნის გამო 25 წევრი არ წასულა პარტიიდან, ადგილობრივი ორგანიზაციის თავმჯდომარე ამბობს, რომ აგრძელებს მუშაობას, სენაკში რესპუბლიკურ პარტიას საკმაოდ ძლიერი წარმომადგენლობა ჰყავს, 150 წევრისგან შედგება ის და ისინი ჩვეულებრივ აგრძელებენ მუშაობას. მე მაქვს 25-ვე წევრის განცხადება, სადაც ისინი ამბობენ, რომ მათზე არანაირი ზეწოლა არ ყოფილა და ეს იყო მათი პირადი გადაწყვეტილება", - განაცხადა ხათუნა სამნიძემ.