შიდა ქართლში სტიქიის შედეგებს ებრძვიან

- +

11 იანვარი. 2018. 02:45

შიდა ქართლის რამდენიმე რაიონსა და სოფელში სტიქიის შედეგებს ებრძვიან. ძლიერი წვიმის შედეგად დატბორილი სახლების ნაწილიდან წყლის ამოტუმბვა უკვე დასრულდა, ხოლო მეორე ნაწილში შესაბამისი სამუშაოები წყლის დონის დაწევის შემდეგ დაიწყება.

პირველ არხს საგანგებო სიტუაციების მართვის სააგენტოში განუცხადეს, რომ ხაშურში წყლით დატბორილი 50-ზე მეტი სახლიდან სახანძრო ბრიგადებმა წყლის ამოტუმბვა უკვე შეძლეს, თუმცა სამუშაოები ისევ გრძელდება. უწყების წარმომადგენლის, მამუკა ყირიმელის თქმით, თბილისიდან მობილიზებულია სამაშველო სამსახურის დამატებითი ჯგუფები, რომლებიც უწყვეტად, 24-საათიანი რეჟიმით იმუშავებენ.

ძლიერმა წვიმამ პრობლემები შექმნა ქარელის რაიონშიც, სადაც ექვს სოფელში სახლები დაიტბორა.

რაც შეეხება გომში არსებულ ვითარებას, მეხანძრე-მაშველები წყლის ამოტუმბვის სამუშაოების დაწყებას ამ დრომდე ვერ ახერხებენ. როგორც საგანგებო სიტუაციების მართვის სააგენტოში განაცხადეს, სახანძრო ბრიგადები ამოტუმბვის სამუშაოებს წყლის დონის დაწევის შემდეგ დაიწყებენ.

მოსახლეობა ადგილობრივ ხელისუფლებას სწრაფ რეაგირებასა და სტიქიასთან ბრძოლაში დახმარებას სთხოვს.

ძლიერი წვიმის გამო ხაშურსა და ახლომდებარე სოფლებში საცხოვრებელი სახლები გასულ ღამეს დაიტბორა.