თავდაცვისა და უშიშროების კომიტეტის თავმჯდომარემ, ირაკლი სესიაშვილმა „პალიტრანიუსის" გადაცემაში „360 გრადუსი" განაცხადა, რომ გამოწვევების მიუხედავად საქართველომ მშვიდობისა და სტაბილურობის შენარჩუნება მოახერხა.

„ჩვენ რატომღაც დაგვჩემდა, რომ სიტუაციას ვამუქებთ. შემიძლია ვთქვა, რომ როცა საქმე ეხებოდა ე.წ ისლამურ სახელმწიფოს, საქართველომ ამ ვითარებაში ყველაზე ეფექტურად იმოქმედა სხვა სახელმწიფოებთან შედარებით. ჩვენ ვიყავით და ვართ ძალიან ახლოს სირიასთან, გარშემო უამრავი პრობლემაა და ამ ვითარებაში საქართველომ არამარტო შეინარჩუნა მშვიდი გარემო, არამედ მაქსიმალურად მოვჭერით გზები ტერორისტებისთვის, როგორც ტრანზიტული თვალსაზრისით, ისე გადინების კუთხით.

მხოლოდ გერმანიიდან 200 გოგო იყო წასული ე.წ ისლამურ სახელმწიფოში და ჩვენს ქვეყანაში დაახლოებით 35 კაცზეა საუბარი. თქვენ არ დაგავიწყდეთ, რომ დავიჭირეთ ჩვენი თანამოქალაქე, რომელიც ხელს უწყობდა ახალგაზრდებს გადასვლაში და მაქსიმალურად ჩავჭერით ასეთი გზები", - განაცხადა ირაკლი სესიაშვილმა.