თურქეთმა სირიის ჩრდილოეთ ნაწილში, აფრინის რაიონში, სადაც ქურთების პოზიციებია, ტანკები შეიყვანა.

არსებული ინფორმაციით, მძიმე ტექნიკა „სირიის თავისუფლების არმიის" მხარდასაჭერად ქურთებს დაუპირისპირდება.

მანამდე თურქეთის ავიაციამ აფრინის რაიონში ქურთთა პოზიციები დაბომბა. თურქეთის გენშტაბმა სამხედრო ოპერაციის სახელწოდებით „ზეთისხილის რტო" დაწყების შესახებ განაცხადა. როგორც განცხადებაშია აღნიშნული, ოპერაცია „სირიის ტერიტორიული მთლიანობის პატივისცემით" ჩატარდება.

მედიის ცნობით, თურქეთის ავიაციამ 108 სამიზნე ობიექტზე მიიტანა იერიში, მათ შორის, აეროდრომზე, რომლითაც აშშ ქურთებს იარაღით ამარაგებდა.

თურქეთის მიერ ოპერაციის დაწყების პარალელურად, რუსეთის თავდაცვის სამინისტრომ აფრინის რაიონიდან რუსი სამხედროების გაყვანის განკარგულება გასცა.

თურქეთის პრეზიდენტმა რეჯეფ თაიფ ერდოღანმა განაცხადა, რომ სირიაში, აფრინში ანტიტერორისტული ოპერაცია, ფაქტობრივად, დაწყებულია. თურქეთის პრეზიდენტმა მოუწოდა დასავლეთს, გადახედოს საკუთარ პოლიტიკას სირიაში და შეწყვიტოს თანამშრომლობა ქურთ ტერორისტებთან, რომლებიც ამერიკამ და ევროკავშირმა ტერორისტული ორგანიზაციების სიაში შეიყვანეს.

15 იანვარს, თურქეთის პრეზიდენტმა რეჯეფ ტაიპ ერდოღანმა სირიის სასაზღვრო ძალებს ტერორისტული არმია უწოდა და აღნიშნა, რომ სრულ დაკომპლექტებამდე აღნიშნულ სამხედრო ფორმირებას თურქეთი გაანეიტრალებს.