საპარლამენტო უმრავლესობის ერთ-ერთი ლიდერი გიორგი ვოლსკი მიიჩნევს, რომ საქართველოს ვიზა-ლიბერალიზაციის რეჟიმის მისაღებად პრობლემები არ შეექმნება. როგორც ვოლსკიმ ჟურნალისტებთან საუბრისას განაცხადა, ვიზა-ლიბერალიზაციასთან დაკავშირებით პოზიტიური მოლოდინები არსებობს.  

„მე უფრო გავამახვილებდი ყურადღებას იმაზე, თუ რას წარმოადგენს დღეს საქართველო. ეს არის 21-ე საუკუნის განვითარებული ევროპული ქვეყანა - განვითარებული თავისი ხედვებით, პოლიტიკური სისტემით, სტაბილურობით, მიუხედავად იმ უამრავი პრობლემისა, რომელიც პატარა ქვეყანას დაატყდა თავს და მიუხედავად გამოწვევებისა. ვფიქრობ, საქართველოს ღირსეული ადგილი უნდა ეკავოს ევროპულ ოჯახში და ვიზალიბერალიზაცია ამის ერთ-ერთი გამოხატულება იქნება. ეს არ არის თემა, რომელიც მხოლოდ საქართველოს სურვილს უკავშირდება. ევროპული სურვილიც არის, რომ მათ რიგებს შეემატოს ის ქვეყანა, რომელიც ამას იმსახურებს და პოლიტიკურადაც მნიშვნელოვანია", - განაცხადა ვოლსკიმ.

ევროპარლამენტის სამოქალაქო თავისუფლებების, სამართლისა და შინაგან საქმეთა კომიტეტი დღეს საქართველოსთვის სავიზო რეჟიმის გაუქმების საკითხს განიხილავს.

საკანონმდებლო ინიციატივა ითვალისწინებს საქართველოს იმ ქვეყნების სიაში გადაყვანას, რომლის მოქალაქეები უვიზო რეჟიმით სარგებლობენ.