უკრაინის სახელმწიფო სასაზღვრო სამსახურის ხელმძღვანელი ოლეგ სლობოდიანი ადასტურებს, რომ ოდესის ოლქის ყოფილი გუბერნატორი მიხეილ სააკაშვილი პოლონეთში გააძევეს, საიდანაც მან რამდენიმე თვის წინ უკრაინის საზღვარი უკანონოდ გადაკვეთა. ამის შესახებ სლობოდიანმა უკრაინულ მედიას განუცხადა.

სააკაშვილის პარტიის ინფორმაციით, თვითმფრინავი, რომელშიც სააკაშვილი იმყოფება, ვარშავის აეროპორტში რამდენიმე წუთში დაეშვება.

უკრაინული მედიის ცნობით, სააკაშვილი კიევიდან ადგილობრივი დროით 16:00 საათზე ჩარტერული რეისით გაფრინდა.

შეგახსენებთ, ოდესის ყოფილი გუბერნატორი მიხეილ სააკაშვილი უცნობმა შეიარაღებულმა პირებმა კიევში, რესტორანში SULUGUNI  დააკავეს. სოციალურ მედიაში სააკაშვილის დაკავების ვიდეომასალაც გავრცელდა.