22 აპრილს მწერალ გურამ ფანჯიკიძის დაბადების დღე გახლდათ. მწერლის ქალიშვილმა ნათია ფანჯიკიძემ მამის დაბადების დღეზე facebook-გვერდზე ემოციური წერილი გამოაქვეყნა:

„მე და მამა, მზეზე მოჭუტულები.

ბავშვი გარაჟებზე დახტის, ვერ ჩამოვხსენით, - მამას უხაროდა, - რა საყვარელია, რომ დახტის!
ნეკნები ჩაიმტვრია! - რა ყოჩაღად აიტანა!
ბავშვი ბუმბულებით და ტირიფის ტოტების ქვედაკაბით დარბის, ინდიელი ვარო, აიჩემა, - მამას უხაროდა, რომ ბავშვი ბოდვაშია. 
მამას უხაროდა ყველაფერი, რასაც ვაკეთებდი, როგორც ვფიქრობდი და მეც მიხაროდა სიცოცხლე. დღეს მისი დაბადების დღეა, საფლავზე წესისამებრ უნდა გავიდე, არადა, რა შუაშია საფლავი. მამა ჩემს სიზმრებშია, ჩემს თვალებშია და კიდევ სადღაც, ასტრალში, აუცილებლად იმ პლანეტაზე, სადაც ღვინის საუკეთესო მოსავალი იცის".