რუსეთი 60 ამერიკელ დიპლომატს გააძევებს და სანქტ-პეტერბურგში ამერიკის შეერთებული შტატების გენერალურ საკონსულოს დახურავს. ამის შესახებ რუსეთის საგარეო საქმეთა მინისტრმა სერგეი ლავროვმა განაცხადა.

აშშ-ის ელჩი რუსეთის საგარეო უწყებაში იმყოფება, სადაც მას შესაბამის გადაწყვეტილებას გააცნობენ.

ასე უპასუხებს მოსკოვი აშშ-დან 60 დიპლომატის გაძევებას და სიეტლში რუსეთის საკონსულოს დახურვას.

ასევე ლავროვმა განაცხადა, რომ ყველა ქვეყანას, საიდანაც რუსი დიპლომატები გააძევეს, რუსეთი თანაზომად პასუხს გასცემს.

შეგახსენებთ, რომ რუსი დიპლომატები აშშ-მა ბრიტანეთში რუსეთის დაზვერევის ყოფილი ოფიცრის სერგეი სკრიპალის მოწამვლის გამო გააძევა.

ყოფილი რუსი აგენტი სერგეი სკრიპალი და მისი შვილი 4 მარტს ინგლისის ქალაქ სოლსბერიში მოწამლეს. მომხდარზე პასუხისმგებლობა დიდმა ბრიტანეთმა რუსეთს დააკისრა და ქვეყნიდან 23 რუსი დიპლომატი გააძევა. მალევე დიდ ბრიტანეთს სოლიდარობა სხვა ქვეყნებმაც გამოუცხადეს.

ამ დროისთვის, რუსი დიპლომატები 30-მდე სახელმწიფომ გააძევა, მათ შორის ამერიკის შეერთებულმა შტატებმა, კანადამ, ავსტრალიამ, ევროკავშირის ქვეყნებმა, მოლდვამ და უკრაინამ. ვაშინგტონის გადაწყვეტილებით, აშშ-ის 60 რუსი დიპლომატი დატოვებს, სიეტლში კი რუსეთის საკონსულო დაიხურება.

ამასთან, გაერთიანებული სამეფოს ტერიტორიაზე სერგეი სკრიპალის მოწამვლის ფაქტთან დაკავშირებით  შვეიცარიის საელჩოს რუსეთის ინტერესების სექციის თანამშრომელს ქვეყნიდან აძევებს საქართველოც.