საქართველოს კათოლიკოს-პატრიარქმა ილია მეორემ სამების საკათედრო ტაძარში საკვირაო ქადაგებისას მრევლს მიმართა, რომ განსაცდელი არის გზა სასუფევლისკენ და მისი არ უნდა ეშინოდეთ.

„კიდევ ერთხელ უნდა გვახსოვდეს, რომ სიხარული და მწუხარება, როგორც ტყუპი ძმები ერთად მოგზაურობენ და ერთად არიან

დღეს არის ის დღე, როცა უფალი იესო ქრისტე იერუსალიმში ზეიმით შედის. სახარებაში წერია, რომ მთელი ქალაქი შეიძრა. მთელი ქალაქი აქებდა და ადიდებდა უფალს, ხვდებოდნენ, როგორც მეფეს: „ოსანა მაღალთა შინა, კურთხეულ არს მომავალი სახელისა უფლისათა“. უფალი ხედავდა მომავალს და ტიროდა. ის ხედავდა, რომ ხალხი, რომელიც ერთ დღეს აქებს და ადიდებს მას, სამი დღის შემდეგ იტყვის: ჯვარს აცვი ეგეო! არ უნდა შეგვეშინდეს, როცა ღმერთი განსაცდელს გვიგზავნის. განსაცდელი ეს არის გზა სასუფეველში“, - ბრძანა პატრიარქმა.

ილია მეორემ მრევლს ბზობის დღესასწაული მიულოცა, დალოცა და ბედნიერი აღდგომის გათენება უსურვა.