ჟურნალისტი გია გაბრიჭიძე სოციალურ ქსელში წერს:

„საქართველოს პარლამენტის წევრმა არ უნდა მიიღოს მოსახლეობის უმრავლესობის საწინააღმდეგო, საკუთარი პრინციპების და მორალურად გაუმართლებელი გადაწყვეტილება. ეს შეიძლება მოხდეს მხოლოდ ისეთ ფორსმაჟორული სიტუაციაში, როდესაც შედეგი ჯერ არ ჩანს და საბოლოოდ ხალხისთვის სასარგებლო იქნება.

სამწუხაროდ ყოვლად უაზრო შეთანხმება რაღაც კვოტირების შესახებ, არამც თუ რაიმე დადებითი შედეგის მომტანია, პირიქით, თავისი არსით ეწინააღმდეგება ამომრჩეველთა აშკარა უმრავლესობის ნებას.

რაც შეეხება ქალბატონ მარიამის ამ განცხადებას, დადებითი მოვლენაა იმ ფონზე, რომლითაც უმაღლესი ხელისუფალნი არ თვლიან თავს ანგარიშვალდებულად ხალხის წინაშე.

იმედი მაქვს, რომ ეს პრეცედენტი უფრო გაღრმავდება“, - წერს გაბრიჭიძე.

შეგახსენებთ, რომ საპარლამენტო უმრავლესობის წევრმა მარიამ ჯაშმა საზოგადოებას ბოდიში მოუხადა. აქვე გთავაზობთ ჯაშის facebook-სტატუსს:

„პატიებას ვთხოვ საზოგადოებას, ვინც შეურაცხყოფად მიიღო ჩემი გადაწყვეტილება ნინია კაკაბაძის მხარდაჭერასთან დაკავშირებით.

ჩემი გადაწყვეტილება ერთადერთ მიზანს ემსახურებოდა - ოპოზიციის კვოტით გათვალისწინებული კანდიდატის არჩევას... თუმცა, სამწუხაროდ, დიდი რეაქცია მოჰყვა ამ ნაბიჯს ჩვენი საზოგადოების მხრიდან და გადავწყვიტე რამდენიმე სიტყვით მომემართა.

20 წელია ვცდილობ ჩემ ქვეყანას და ეკლესიას საქმით დავუმტკიცო სიყვარულიც და პატივისცემაც. ძალიან მერიდება საკუთარ თავზე საუბარი რომ მიწევს... მაგრამ ათასობით ადამიანის სიცოცხლის გადარჩენა შემაძლებინა იმ პროფესიონალურმა გზამ და პროგრამებმა - იმუნიზაციის, შიდსის, მალარიის, C ჰეპატიტის თუ სოლიდარობის ფონდის - რომელთა უკან ვიდექი პირველი ან სულ რამდენიმე თანამოაზრესთან ერთად. საყოველთაო ჯანდაცვის დოკუმენტიც, ისე მოხდა, რომ ჩემი ხელმოწერით გაიგზავნა მთავრობაში, მაგრამ ამ პროგრამის სათავეებთან ბევრი ადამიანი ვიდექით დავით სერგეენკოს ხელმძღვანელობით.

ზუსტად ესეთი მნიშვნელოვანი ცვლილებების შექმნის იმედი მაქვს დღეს უკვე განათლების, მეცნიერების და კულტურის მიმართულებებით.

სისტემურ რეფორმებთან ერთად ვცდილობ სამივე სფეროში ჩვენი ეკლესიის როლი წარმოჩინდეს ისეთი განსაკუთრებული მნიშვნელობით, რომელსაც ჩვენი ქართული მართლმადიდებელი ეკლესია 17-საუკუნოვანი ნამოღვაწარით იმსახურებს.

პარლამენტში არჩევის პირველივე დღეებიდან არ მოვრიდებივარ ერთგვარად ტაბუ-დადებული თემის - სკოლებში რელიგიის ისტორიის სწავლების თუ განათლების, მეცნიერებისა და კულტურის სფეროში ეკლესიასთან უფრო მჭიდრო თანამშრომლობის აუცილებლებლობის წარმოჩინებას, რადგან ეს არის ჩვენი ქვეყნისთვის და ხალხისთვის უაღრესად მნიშვნელოვანი.

და იმ ყველა მასშტაბურ საკითხს შორის, რომელზეც თანამოაზრეებთან და დარგის ექსპერტებთან ერთად ყოველდღიურად ვმუშაობ და რომელიც მალე გახდება ჩვენი საზოგადოებისთვის ცნობილი - ნინია კაკაბაძის არჩევის საკითხი არ ჩამითვლია ესოდენ პრინციპულად.

მიუხედავად ამისა, თუ ჩვენმა საზოგადოებამ შეურაცხოფად მიიღო ჩემი ნაბიჯი - საზოგადოების ამ ნაწილს პატიებას გთხოვთ...“ - წერს მარიამ ჯაში.