საქართველოს სათხილამურო ფედერაციის რიგით მე-11 ყრილობა გაიმართა დღეს სასტუმრო „რედისონ ბლუ ივერიაში“.

ფედერაციის ხელმძღვანელობამ ყრილობაზე 2015-2018 წლებში გაწეული სამუშაოს შესახებ საანგარიშო მოხსენება წარმოადგინა.

ყრილობაზე საქართველოს სათხილამურო  ფედერაციის პრეზიდენტის არჩევნები ჩატარდა, რომელიც ოთხ წელიწადში ერთხელ ტარდება და  ოლიმპიურ 4-წლიან ციკლს ემთხვევა.

ყრილობაზე კენჭისყრის შედეგად გადაწყდა, რომ საქართველოს სათხილამურო ფედერაცია სათხილამურო სპორტს შემდეგი შემადგენლობით უხელმძღვანელებს: პრეზიდენტი - ზურაბ კოსტავა, გენერალური მდივანი - ირინა აჩბა, ვიცე-პრეზიდენტები: ეკატერინე გაბაშვილი, პატრიკ ლანგი, ეკატერინე ორჯონიკიძე, თამაზ გამცემლიძე.

ზურაბ კოსტავას ხედვით, სათხილამურო სპორტი განსაკუთრებით პრიორიტეტულია, ვინაიდან საქართველო მთის ქვეყანაა და ამ სპორტის ხელშეწყობა ჩვენს ქვეყანაში აუცილებელია, სათხილამურო სპორტის განვითარება საქართველოში მნიშვნელოვანია როგორც ტურიზმის  განვითარებისთვის, ასევე, საზოგადოებაში ჯანსაღი ცხოვრების წესის დამკვიდრებისთვის.

ყრილობას ასევე ესწრებოდნენ საქართველოს სათხილამურო ფედერაციის გენერალური სპონსორის ,,სილქნეტის“ დამფუძნებელი გიორგი რამიშვილი და საქართველოს ოლიმპიური კომიტეტის გენერალური მდივანი ემზარ ზენეიშვილი. მათ რეგიონებში სპეციალიზირებული სპორტ-სკოლების გახსნის აუცილებლობაზე ისაუბრეს, რაც საგრძნობლად შეუწყობს ხელს საქართველოში სპორტსმენების რაოდენობის გაზრდას და სამთო სათხილამურო კურორტების კიდევ უფრო განვითარებას.

ყრილობაზე ასევე საუბარი იყო, ქართული სპორტისთვის უმნიშვნელოვანეს ღონისძიებაზე, რომელიც ბაკურიანში 2023 წელს იგეგმება.

„მაისის შუა რიცხვებში ბაკურიანი ოფიციალურად გახდება 2023 წლის სათხილამურო ფრისტაილისა და სნოუბორდის მსოფლიო ჩემპიონატის მასპინძელი კურორტი. ეს არის ძალიან მნიშვნელოვანი ჩვენი ქვეყნისთვის და ზამთრის სპორტისთვის. უდიდესი ძალისხმევაა ჩადებული იმაში, რომ საქართველო კანდიდატი ქვეყანა გამხდარიყო და მჯერა რომ  ამ სპორტის ყველა გულშემატკივარი კიდევ უფრო გაერთიანდება ამ ღონისძიების ხარისხიანად ჩასატარებლად“, - განაცხადა გიორგი რამიშვილი.

16 მაისს საბერძნეთში დასახელდება ქვეყანა, სადაც 2023 წლის სათხილამურო ფრისტაილისა და სნოუბორდის მსოფლიო ჩემპიონატი ჩატარდება. საქართველო ამ დრომდე ერთადერთი კანდიდატია.