ტორონტოში ფეხით მოსიარულეებს სატვირთო მანქანა შეეჯახა. ინფორმაციას კანადის პოლიცია ავრცელებს.

შეჯახება ხალხმრავალ გზაჯვარედინთან მოხდა. ოფიციალური პირების მონაცემებით, სატვირთო 10-მდე ადამიანს შეეჯახა.

ტორონტოს პოლიციის ცნობით, სატვირთო მანქანა შემთხვევის ადგილიდან მიიმალა, თუმცა მოგვიანებით, რამდენიმე უბნის დაშორებით მისი შეჩერება და მძღოლის აყვანა მოხერხდა.

შემთხვევა ადგილობრივი დროით 13:00 საათზე მოხდა. სამართალდამცველები მოსახლეობას მოუწოდებენ, ინციდენტის ადგილიდან თავი შორს დაიჭირონ. შეჩერებულია ახლომდებარე მიწისქვეშა ტრანსპორტის მუშაობაც.

ჯერჯერობით არ ვრცელდება კონკრეტული დეტალები სატვირთოს მძღოლის შესახებ.

მომხდარს უკვე გამოეხმაურა კანადის პრემიერ-მინისტრი ჯასტინ ტრიუდო. მისი თქმით, მომხდარის შესახებ ჯერ პირველადი საგამოძიებო მოქმედებები ტარდება და დამატებითი დეტალები უახლოეს საათებში გახდება ცნობილი.