ანალიტიკოსი სამხედრო-პოლიტიკურ და უსაფრთხოების საკითხებში ამირან სალუქვაძე სოციალურ ქსელში შემდეგი სახის პოსტს აქვეყნებს:

„პოლიტიკური მიმოხილვა. თემები: ბიძინა ივანიშვილი და „ოცნება“. მაჩალიკაშვილის საქმე. ჩრდილოეთ კორეა. ტრაგედია ჩინეთში. მერკელი-ტრამპი. „რუსალი“. სომხეთის მოვლენები.

შიდა პოლიტიკა

1. მთავარი თემაა ბიძინა ივანიშვილის პარტიის თავმჯდომარედ დაბრუნება. ბჭობა იმის თაობაზე, რა გეგმები აქვს, უაზრობაა. გააკეთებს განცხადებას და გამოჩნდება. არაა ასე მარტივად ამოსაცნობი. ერთი რამ ფაქტია, რომ ნახევარი ან ერთი წლით, როგორც თავიდან მოვიდა პოლიტიკაში, არ მოსულა. დაბრუნების მთავარი მიზეზია პოლიტიკური გუნდით უკმაყოფილება. სიღრმეში არ შევალ, უჩემოდაც კარგად ფლობს ვითარებას.

„ოცნების“ წევრებს ერთ რჩევას მივცემ: ერთმანეთის გატანა და დაცვა ისწავლეთ. როცა თავს ესხმიან პრემიერ-მინისტრს ან თქვენს ლიდერს (დამფუძნებელს), ე.ი. თქვენც გესხმიან. აბა, გადახედეთ საკუთარ პოსტებს ან განცხადებებს სხვადასხვა შემოტევების დროს, თქვენ არ გიტევენ პირადად და კმაყოფილი ხართ. კოლეგის დასუსტება საკუთარი გაძლიერება გგონიათ. სოციალურ ქსელს საერთოდ არაეფექტიანად იყენებთ. მთელი მედია დგას facebook-ზე (რამდენიმეს არ ეხება). როგორ იქცევიან თქვენი ოპონენტები? როცა ეკითხებიან, რა ხდება სირიაში ან ჩრდილოეთ კორეაშიო, ჯერ ხეების გადარგვით იწყებენ, შემდეგ საუბრობენ, როგორ ინგრევა ქვეყანა და ამის შემდეგ პასუხობენ დასმულ კითხვას. ეს ისე...

2. მაჩალიკაშვილის საქმე. ამ საკითხს კარგად უნდა ჩავუღრმავდე, მაგრამ გუშინდელ სიუჟეტში მომეჩვენა, რომ დნმ-ის კვალზე არ გვესაუბრნენ და მხოლოდ თითის ანაბეჭდები მოგვახსენეს. შემთხვევით თუ განზრახ? გენეტიკური და კლასიკური დაქტილოსკოპიური ექსპერტიზა, ანუ ერთი ადამიანის ბიოლოგიური იდენტიფიკაცია ხდება უნიკალური გენეტიკური კოდის მიხედვით, ხოლო მეორეთი კი - თითის ანაბეჭდებით. ჰოდა, რომელი ანალიზი გამოქვეყნდა, იქნებ გაგვარკვიოთ. საერთოდ, ცუდად უჩხიკინებთ-მეთქი პანკისს და არ გესმით. ეს საკითხი კონკრეტული ერთი ფაქტის ჭრილში უნდა განიხილოთ და არა ხეობის.

საგარეო პოლიტიკა

1. მთავარი თემა ჩრდილოეთ და სამხრეთ კორეის ლიდერების შეხვედრაა. შეხვდნენ დემარკაციის ხაზზე (რუსები შოკში არიან - https://youtu.be/-d-4ybqLT7A ), დარგეს მშვიდობის ხე, იარეს ხელიხელ ჩაკიდებულებმა, ერთი ნაცია ვართ და ძმები უნდა ვიყოთო. ნახეთ ვიდეო, საინტერესოა.

2. ჩინეთში ტრაგედია დატრიალდა. შურისძიების მოტივით, დამცირებების გამო მოსწავლე თანატოლებს თავს დანით დაესხა. მსხვერპლი 9-მდე გაიზარდა. რამდენიმე ბავშვი საავადმყოფოშია.

3. მერკელის და ტრამპის შეხვედრა გაცილებით ცივი იყო, ვიდრე მაკრონ-ტრამპის. გერმანია NATO-ში შენატანს მშპ-ს 2%-მდე გაზრდის. სხვა საკითხებში, განსაკუთრებით ეკონომიკურ პოლიტიკაში, შეთანხმებები ვერ მოხერხდა. აშშ თავის პოზიციაზე რჩება. სულ 20-წუთიანი ოფიციალური მოლაპარაკებები და 1,5-საათიანი ოფიციალური სადილი. მობილურზეც შეიძლებოდა დარეკვა.

4. დერიპასკამ ხელმძღვანელი პოსტები და საკონტროლო პაკეტი დათმო აშშ-ის სანქციების მოხსნის მოლოდინში, თუმცა, პასუხად მაინც უარი მიიღო.

5. სომხეთი. ვფიქრობ, დავწერო თუ არა ვრცლად, რადგან არ მინდა, გავაუბრალოო ის დადებითი მუხტი და ემოციები, რაც მოსახლეობამ აჩვენა. მაგრამ ძალიან არასწორ შეფასებებს ვაკეთებთ. აქსიომაა და ამ მოვლენებმა დაამტკიცა, რომ სომხეთში სამოქალაქო საზოგადოება არსებობს და ძალიან აქტიურია. მაგრამ კონკრეტული მასშტაბური აქციების მოწყობას თავისი დამკვეთი და შემსრულებელი ჰყავს ხოლმე.

აბა, დავფიქრდეთ, რატომ გადადგა სარგსიანი და არ მიდის კარაპეტიანი, რომელიც ვიცე-პრემიერი იყო? რა ხდებოდა მანამდე? სარგსიანს საკუთარი კანდიდატურა არ უნდა წამოეყენებინა. შესაბამისად, კარაპეტიანი პრემიერად რჩებოდა და არავის, არც მოსახლეობას, არც შიდა ან გარე ძალებს, პრეტენზია არ ჰქონდა.

სარგსიანმა კი ჩააჩოჩა კარაპეტიანი პრემიერობიდან ვიცე-პრემიერად. მის უკან კი ძალები დგანან. რატომ იყო გაჩერებული აზერბაიჯანი? წაიკითხეთ პრეზიდენტის ადმინისტრაციის განცხადება. რატომ გააქტიურდა ამ დღეებში და დაიწყო ჯარების გადმოწევა საზღვრისკენ? თუ აზერბაიჯანი სამხედრო მოქმედებებს დაიწყებს, ეს კარაპეტიანისთვის მომგებიანი იქნება. თუთაშხია ხომ გახსოვთ? არ ჰგავს ერთი კაცის დაწერილს? გაიხსენეთ ასევე 11 აპრილს სომხეთის მიერ ევროკავშირთან საყოველთაო ვაჭრობის შესახებ ხელშეკრულების გაფორმება და საუბრები ასოცირების შესახებ. რევოლუციურ ტალღას კი ყოველთვის მოაქვს სიურპრიზები და ცოტათი გამოვიდა კონტროლიდან. მაგრამ, როგორც არ უნდა განვითარდეს, ყარაბაღი დარჩება საგარეო ვექტორის განმსაზღვრელ ფაქტორად. გაიხსენეთ ჩემი 24 აპრილის (გენოციდის წლისთავია, რომელიც ყველას დაავიწყდა, რატომ?) ინტერვიუ, სადაც მხოლოდ მინიშნებები გავაკეთე  (https://m.facebook.com/story.php?story_fbid=2137625212922271&id=100000244408994 ).

დღეს ამით შემოვიფარგლოთ და მივაქციოთ ყურადღება, როგორ განვითარდება ეს თეზისები დღეიდან ანალიტიკურ პუბლიკაციებში“, - წერს სალუქვაძე.