„თუ ეს დაპირებები არ შესრულდება, ჩვენ ყოველთვის შეგვიძლია ამ თავისუფალ ქალაქში, თავისუფალი პარლამენტის წინ, ისევ შევიკრიბოთ, ან ვიცეკვოთ, ან მოვუსმინოთ მუსიკას“, – ამის შესახებ შინაგან საქმეთა მინისტრმა გიორგი გახარიამ „თეთრი ხმაურის მოძრაობის“ მიერ ორგანიზებული აქციის მონაწილეებს განუცხადა.

„ჩვენი ყველას საერთო ამოცანაა, რომ დღეს ეს საღამო დავასრულოთ მშვიდობიანად. უკვე მეორე დღეა, თქვენი გამოხატვის თავისუფლება აქ, ამ მოედანზე არავის შეუზღუდავს. ასევე, იცით, რომ თითოეული პოლიციელი დღეს და გუშინაც ზრუნავდა თქვენს უსაფრთხოებაზე.

ახლა იმისთვის, რომ ჩვენ ყველამ მივაღწიოთ ჩვენს მიზანს – ერთობლივად ვიპოვოთ სწორი გამოსავალი საკმაოდ რთული ამოცანებიდან, უბრალოდ, უნდა გადავინაცვლოთ უფრო სამუშაო რეჟიმში.

ამიტომ, ჩემი მხრიდან გპირდებით, რომ ხვალ, დილით 10:00 საათზე, თქვენს წარმომადგენლებთან ერთად, რომელსაც თქვენ აირჩევთ,  დეტალურად განვიხილავ პარასკევი დღის ყოველ წუთს. ყველა ის ადამიანი, რომელიც ერთობლივად შევთანხმდებით, რომ მისი უფლება დაირღვა, რა თქმა უნდა, უფლება აღდგენილი იქნება.

მე ასევე გპირდებით, რომ ჩვენ კონკრეტულ შედეგებს მივაღწევთ ნარკოპოლიტიკის მიმართულებით.

ასევე, ვთანხმდებით იმაზე, რომ თუ ეს დაპირებები არ შესრულდება, ჩვენ ყოველთვის შეგვიძლია, ამ თავისუფალ ქალაქში, თავისუფალი პარლამენტის წინ, ისევე შევიკრიბოთ, ან ვიცეკვოთ, ან მოვუსმინოთ მუსიკას“, – განაცხადა გიორგი გახარიამ.