ფინანსთა მინისტრმა მამუკა ბახტაძემ საერთაშორისო სავალუტო ფონდის დასკვნა შეაფასა, რომლის მიხედვითაც, საქართველოში აზიისა და კავკასიის სხვა ქვეყნებთან შედარებით პრობლემური ვალები ნაკლებია. ბახტაძის თქმით, სავალუტო ფონდი სრულად უჭერს მხარს ფინანსთა სამინისტროსა და ეროვნული ბანკის ინიციატივებს, რომელიც ქვეყანაში ჭარბვალიანობის აღმოფხვრას ემსახურება.

„საერთაშორისო სავალუტო ფონდი სრულად უჭერს მხარს ჩვენს და ეროვნული ბანკის ინიციატივებს, რომელიც უკავშირდება საქართველოში ჭარბვალიანობის პრობლემის აღმოფხვრას. ეს ნიშნავს იმას, რომ საერთაშორისო სავალუტო ფონდი, ისევე როგორც მსოფლიო ბანკი, იზიარებს იმ რისკებს, რასაც ჩვენ ვხედავთ ჭარბვალიანობასთან დაკავშირებით. როდესაც ჩვენ ვსაუბრობთ, რომ სესხების დიდი ნაწილი არ არის ვადაგასული, რა თქმა უნდა, კარგია, მაგრამ ეს იმას არ ნიშნავს, რომ საქართველოში არ გვაქვს ჭარბვალიანობის რისკი. ეს რისკი ქვეყანაში გვაქვს და ამაზე საუბრობს ყველა საერთაშორისო ფინანსური ინსტიტუტი თავის დასკვნაში, მათ შორის საერთაშორისო სავალუტო ფონდი“, - განაცხადა მამუკა ბახტაძემ.