ჩემპიონთა ლიგის 2015/2016 წლების გათამაშების ნახევარფინალური ეტაპის განმეორებით შეხვედრაში, „სანტიაგო ბერნაბეუზე" მანდრიდის „რეალი" „მანჩესტერ სიტის" უმაპინძლებს. გუნდებს შორის პირველი მატჩი ინგლისში, გატანილი გოლების გარეშე - 0:0 დასრულდა.

მიუხედავად იმისა, რომ წლების წინ „სიტიში" ჩადებულმა ინვესტიციებმა გარკვეულწილად გაამართლეს და კლუბი ჩინებულად ასპარეზობს პრემიერ ლიგაში, მთავარი მიზანი - ჩემპიონთა ლიგის თასი, ჯერჯერობით მიუღწეველი რჩება. მიმდინარე გათამაშებაში „ქალაქელებმა" ევროპის ყველაზე პრესტიჟული საკლუბო ტურნირის ნახევარფინალში გააღწიეს, თუმცა ეს ქვეყნის შიდა პირველობაზე მათ თამაშზეც აისახა და პელეგრინის შეგირდები ჯერჯერობით მხოლოდ მეოთხე ადგილს სჯერდებიან.

რაც შეეხება „რეალს", გუნდი ზინედინ ზიდანმა ჩაიბარა და „სამეფო კლუბს" ახალი სუნთქვა გაეხსნა. ფრანგის საფეხბურთო ფილოსოფია რამდენიმე მატჩში ნათლად გამოიხატა და ფეხბურთელების შემართებაზეც აისახა. „რეალი" პრიმერადივიზიონის სატურნირო ცხრილში ჯერჯერობით მხოლოდ მესამე ადგილს სჯერდება და ამიტომ, სრული კონცენტრაციით ჩემპიონთა ლიგაზეა მომართული.

ნახევარფინალური ეტაპის პირველ მატჩამდე, გუნდები ევროთასებზე მხოლოდ ერთხელ, 2012/2013 წლების გათამაშების ჯგუფურ ეტაპზე შეხვედრიან. მადრიდული შეხვედრა მასპინძელთა გამარჯვებით - 3:2 დასრულდა, ინგლისში კი გუნდები ფრეს (1:1) დასჯერდნენ. მაშინ ჟოზე მოურინიოს „რეალმა" ჯგუფური ეტაპი მეორე ადგილით გადალახა, რობერტო მანჩინის „სიტი" კი ჯგუფში ბოლო ადგილით ჩარჩა.

მიუხედავად იმისა, რომ ფავორიტად დღევანდელ შეხვედრაში „რეალი" სახელდება, გუნდების შანსები მეტ-ნაკლებად თანაბრად უნდა შევაფასოთ. მადრიდელებს დღეს ბენზემა და კაზემირო ვერ დაეხმარებიან, „სიტის" კი ნახევარდაცვის ბურჯი - იაია ტურე დაუბრუნდა, თუმცა ინგლისელებს ამჯერად დავიდ სილვასა და საბალეტას გარეშე მოუწევთ ფონს გასვლა.

გუნდების სავარაუდო შემადგენლობები:

„რეალი" (4-3-3): კეილორ ნავასი - კარვახალი, პეპე, სერხიო რამოსი, მარსელო - მოდრიჩი, კროოსი, ისკო - ბეილი, რონალდუ, ლუკას ვასკესი;

„მანჩესტერ სიტი" (4-2-3-1): ჰარტი - სანია, ოტამენდი, კომპანი, კლიში - ფერნანდო, ფერნანდინიო - ხესუს ნავასი, ტურე, დე ბრუინი - აგუერო;

არ ითამაშებენ: ბენზემა, კაზემირო - დავიდ სილვა, საალეტა;

განაცხადს მიღმა: ნასრი („მანჩესტერ სიტი").