მსოფლიო საპატრიარქოს წარმომადგენელმა მიტროპოლიტმა ემანუელმა და სმირნის მიტროპოლიტმა ბართლომეუსმა სამების ტაძარში საქართველოს პატრიარქთან ილია მეორესთან ერთად წირვა აღავლინეს.

„უზომოდ მოხარულები ვართ, რომ თქვენთან ერთად მონაწილეობა მივიღეთ საღვთო ლიტურგიაში. თქვენთან ჩამოტანილი გვაქვს მსოფლიო პატრიარქის, ბართლომეუსის ძმური სიყვარული. ჩვენ მოხარული ვართ თქვენთან თანამშრომლობით ეკლესიისთვის საჭირბოროტო საკითხებთან დაკავშირებით. მსოფლიო საპატრიარქო და მისი უწმინდესობა, მსოფლიო პატრიარქი ბართლომეუსი ყოველთვის არის თქვენს გვერდით ყველა იმ საკითხში, რომელშიც თქვენი ეკლესია საჭიროებს თანადგომას და დახმარებას. თქვენო უწმინდესობავ, ყოველთვის გწამდეთ და გჯეროდეთ, რომ მსოფლიო პატრიარქი და მსოფლიო საპატრიარქო თქვენს მიერ წამოწყებულ საქმეებში იქნებიან თქვენი თანაშემწეები, თქვენს გვერდში იდგებიან. ღმერთმა დალოცოს და გააძლიეროს ქართველი ხალხი, რომელიც ბურჯია რეგიონში მართლმადიდებლობის და ქრისტიანობის“, - მიმართა მიტროპოლიტმა ილია მეორეს.

თავის მხრივ, საქართველოს პატრიარქმა სტუმრებს საჩუქრად ხატები გადასცა.

„ჩვენ ბედნიერი ვართ, რომ დღეს ჩვენთან იმყოფებით. დღეს შესრულდა წმინდა წირვა სამების ტაძარში, სადაც მოვიხსენიეთ ყველა პატრიარქი და მღვდელმთავარი“, - განაცხადა პატრიარქმა.